VOV4.Xơ Đăng - Hâi lơ 18/10, pôa Phạm Minh Chính, Ngế pro xiâm hnê ngăn Chin phuh hiăng tơpui phôn ƀă pôa Anthony Albanese, Ngế pro xiâm hnê ngăn kong têa Australia vâ tơpui tơno ‘na mâu troăng thăm tơrŭm cheăng pơla péa tơnêi têa, ki má lối cho ‘na thăm tơrŭm cheăng kâ – tê mơdró – mơ’no liăn cheăng, tơmiât troh leh tơbâ 50 hơnăm mơjiâng tơrŭm tơpui kâ péa tơnêi têa hơnăm 2023.

Pôa Phạm Minh Chính ƀă Ngế pro xiâm hnê ngăn kong têa Australia hiăng vêh tối mâu troăng mơnhông lĕm ƀă châ tơƀrê tung tơrŭm cheăng péa tơnêi têa tung pơla kố. Péa Ngế pro xiâm hnê ngăn tơnêi têa kheăn kơdeăn tơdroăng péa tơnêi têa rak mâu tơdroăng tơpui tơno pơla khu râ xiâm, trâm mâ khu râ kăn xiâm, tung mê, ai tơdroăng hbrâ ăm roh lăm pôu pêi cheăng kong têa Australia la ngiâ dêi pôa Vương Đình Huệ, Kăn xiâm hnê ngăn Kuô̆k hô̆i.

Pôa Phạm Minh Chính, Ngế pro xiâm hnê ngăn Chin phuh tơpui phôn ƀă Ngế pro xiâm hnê ngăn kong têa Australia

Pôa Phạm Minh Chính pơkâ thế peăng kong têa Australia pơtối tŏng kum kih thuât ƀă lôu péa kơchơ tê mơdró tâ mê nếo ăm tê plâi kâ ƀă ká xi xŏng dêi Việt Nam. Pôa Phạm Minh Chính xuân pơkâ thế Australia mơhnhôk mâu khu tê mơdró kong têa Australia thăm mơ’no liăn cheăng hên tâ mê nếo a Việt Nam.

VOV/Tơplôu: A Sa Ly