Tung tơdroăng lăm pôu râ kăn xiâm tơnêi têa troh Việt Nam  dêi Kăn xiâm pơkuâ kong têa Hàn Quốc, kơxê hâi lơ 23/6, a Hà Nội, pôa Phạm Minh Chính, Ngế pro xiâm hnê ngăn Chin phuh ƀă pôa Yoon Suk-yeol, Kăn xiâm pơkuâ kong têa Hàn Quốc rơtế veăng Hôp ƀă Khu mơdró pơla Việt Nam ƀă Hàn Quốc. A rôh hôp, péa pâ tơpui tơdrăng, ing tơdroăng vâ mơjiâng, tối ăm dêi rơpó ‘nâi tuăn tơmiât vâ pêi, hriăn plĕng ki nếo, mâu troăng rơhlâ vâ ‘mâi hơ’lêh tơdroăng ‘no liăn cheăng, tê mơdró dêi Việt Nam, mơdêk tơrŭm cheăng kâ - ‘no liăn cheăng pơla péa tơnêi têa.

Pôa Phạm Minh Chính, Ngế pro xiâm hnê ngăn Chin phuh khĕn kơdeăn khât ƀă hlối mơnê mâu tơdroăng tối tơdrăng dêi mâu khu mơdró Hàn Quốc ‘na tơdroăng tê mơdró a Việt Nam ƀă hlối tơhrâ ‘no liăn cheăng a Việt Nam tung mâu tơdroăng cheăng ki nếo. Kố cho vâ mơhno nhên vâ rơtế ƀă, loi khât dêi rơpó, hlê ƀă tối ăm dêi rơpó ‘nâi mâu khu mơdró Hàn Quốc ƀă Việt Nam ing tơdroăng ai pơxúa tơtro, tâng ôh tá mơhúa xuân hơlêm dêi rơpó, mơ-eăm tơkâ luâ tŭm tơdroăng xơpá vâ mơnhông mơdêk.

Tung pơla lâp plâi tơnêi dế hơ’lêh rĕng, rơ-iô, pá vâ ‘nâi hdrối, Việt Nam hâk mơnê ki veăng pêi kơhnâ khât dêi mâu khu ‘no liăn cheăng kong têa ê, malối mâu khu mơdró dêi Hàn Quốc.