Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa ăm ‘nâi, ing apoăng hneăng cheăng troh nôkố, pin hiăng tơkŭm po 25 rôh hôp chuyên đề ‘na mơjiâng luât; ăm rơkong tơpui tối, séa ngăn, tơbleăng vâ chê 100 tơdroăng pơkâ thế mơjiâng luât, tơdroăng tơkêa ƀă mâu tơdroăng ki tơdjâk troh; cho mâu tơdroăng ki kal, pêi pro tơdrêng vâ pêi klêi troăng hơlâ luât, tŏng kum mâu tơdroăng xơpá, tơvâ, pro tơ’lêi hlâu mâu kơxô̆ liăn ăm mơnhông môi tiah mâu Luât: Tơnêi tơníu, Luât mâu khu tơrŭm ăm mung liăn, Luât tơnêi tơníu hngêi trăng, Luât Hngêi ối.

Ngế pro xiâm hnê ngăn tơnêi têa pơkâ thế mâu ngế cheăng tung Chin phuh tơkŭm tuăn ngoâ, pơtối hơ’lêh hiâm mno; tối tơbleăng, ăm mâu rơkong tơpui tối ‘nâng ‘nâi, hleăng nhên, tối tơdrăng tro tung mâu tơdroăng ki kal tơpui; tơkŭm tơpui tơno ‘na mâu tơdroăng ki kal, ối ai rơkong tơpui pơra phá dêi rơpó kal tơpui tơno, pâ rơkong tơpui tối dêi Chin phuh; rak vế tơdroăng tơƀrê, rơkê dêi Rôh hôp.