Kơxo lơ18/5, pôa Phạm Minh Chính, Ngế pro xiâm hnê ngăn tơnêi têa tơdah jâ Ngozi Okonjo-Iweala, kăn xiâm pơkuâ Khu tơrŭm Tê mơdró lâp plâi tơnêi (WTO) dế ai rôh pôu pêi cheăng a Việt Nam. Ngế pro xiâm hnê ngăn tơnêi têa mơnhên tối khât hnoăng cheăng ƀă tơdroăng cheăng dêi kăn xiâm pơkuâ ngăn tê mơdró tung tơdroăng pơkuâ ƀă mơdêk mâu tơdroăng cheăng dêi WTO; rơkâu kơ jâ xua mâu tơdroăng ki pêi pro châ tơƀrê sap ing pro kăn xiâm pơkuâ Khu pơkuâ ngăn Tê mơdró WTO sap ing khế 3/2021.

Ngế pro xiâm hnê ngăn tơnêi têa tối nhên, cho môi tơnêi têa tơrŭm cheăng ai hnoăng cheăng pôu râng dêi WTO, Việt Nam pơkâ mơdêk hnoăng cheăng hbrâ rơnáu kơhnâ veăng a mâu tơdroăng ki tơrŭm cheăng dêi WTO, mơ-eăm pêi pro tŭm mâu tơdroăng tơhrâ  ƀă veăng kum kơhnâ tung hiâm mơno mơjiâng bro ƀă mâu tơdroăng ki kal tơdjuôm a WTO; Ngế pro xiâm hnê ngăn tơnêi têa rơhêng vâ ngế krê cho kăn xiâm pơkuâ khu tê mơdró ƀă WTO pơtối tŏng kum mơdêk mâu tơdroăng tơrŭm cheăng, tŏng kum liăn, kih thuât dêi WTO vâ kum Việt Nam mơdêk tơƀrê mot tơrŭm cheăng kâ ƀă kong têa ê, pơtối veăng kum pro pơxúa tung mâu tơdroăng cheăng dêi WTO.