Kơxê măng lơ 21/12, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah pôa Tomikazu Fukuda, ngế pơkuâ kong pơlê Tochigi, Nhuk dế ai rôh pôu ƀă pêi cheăng a Việt Nam. A rôh tơdah, pôa Phạm Minh Chính ăm ‘nâi, tơrŭm cheăng ƀă kong têa tung la ngiâ trâu hngế Việt Nam – Nhuk dế tung hneăng ki mơnhông tơniăn lĕm, tâi tâng ƀă tơdroăng loi tơngah xiâm dêi Việt Nam, cho khu ki tŏng ODA kân má môi, khu ki ‘no liăn ƀă kong têa tơrŭm ôm hyô má pái, kong têa tê mơdró ối má pŭn dêi Việt Nam.

Tơrŭm pơla péa tơnêi têa rế hía rế trâu hngế, cho tơdroăng tơbleăng pêi pro nhên ƀă tơƀrê mâu tơdroăng tơkêa dêi kăn pơkuâ péa tơnêi têa, kum mơdêk tơrŭm cheăng Việt Nam – Nhuk mơnhông ai pơxúa. Hơnăm 2023 cho hơnăm tơbâ 50 hơnăm mơjiâng tơrŭm cheăng tơpui kâ Việt Nam – Nhuk, pôa Phạm Minh Chính loi tơngah ƀă ivá mơ-eăm, tuăn hiâm tơrŭm tơroâ, tơrŭm pơla kong pơlê Tochigi ƀă mâu kong pơlê Việt Nam kô chiâng tíu ki bâ eăng nếo ƀă cho tơdroăng ki xiâm ăm tơrŭm cheăng tung la ngiâ trâu hngế Việt Nam – Nhuk.