Kơxo lơ 4/1, pôa Phạm Minh Chính, Ngế pro xiâm hnê ngăn Chin phuh veăng hôp ƀă tơpui hnê mơhno a rôh hôp mơgêi hnoăng cheăng hơnăm 2022, tơbleăng hnoăng cheăng hơnăm 2023 dêi kơvâ Pơkâ, mơ’no liăn cheăng ƀă riân ngăn kế tơmeăm. Rôh hôp kố châ tơdjêp ‘no tơdrêng ing troăng hyôh internet troh 63 to kong pơlê, pơlê kong kân tung lâp tơnêi têa. Tơpui a rôh hôp, pôa Phạm Minh Chính pơkâ thế, tung la ngiâ ah, Khu xiâm pơkâ ƀă ‘no liăn cheăng kal pêi pro tro hnoăng cheăng dêi tơná, mơdêk khât hnoăng cheăng cho kơ koan tí tăng ‘nâi plĕng dêi Đảng, Tơnêi têa, Chin phuh, pơtối mơeăm tâ nếo tung hnoăng cheăng pơkuâ ƀă pơkâ ƀă xing xoăng cheăng kâ kân, séa ngăn tơdroăng cheăng tung kơpong ƀă tung lâp plâi tơnêi, hbrâ rơnáu chêh bro hlá mơ-éa vâ teăm tơdrêng tí tăng ‘nâi plĕng tung tơdroăng cheăng la ngiâ ƀă Chin phuh. Ngế pro xiâm hnê ngăn Chin phuh tối, mâu troăng hơlâ cho kal tung tung hnê mơhno, pơkuâ ƀă tơbleăng mâu tơdroăng pơkâ dêi Đảng, Kuô̆k hô̆i ƀă Chin phuh.

Pakĭng mê, Ngế pro xiâm hnê ngăn tơnêi têa pơkâ thế, Khu xiâm pơkâ ƀă ‘no liăn cheăng mơdêk rơdêi tơdroăng ki hơ’lêh kơxô̆ tơnêi têa tung tâi tâng mâu kơvâ cheăng dế rak ngăn; mơdêk túa ki hơ’lêh chêh pro hlá mơ-éa, mơdêk hnoăng tơbleăng tơdrăng.