Hdrối rôh hôp má 5, Kuô̆k hô̆i hneăng 15, hâi lơ 11/5, khu kăn Kuô̆k hô̆i kong pơlê Lâm Đồng trâm mâ kuăn pơlê a bêng 9, pơlê kong kơdrâm Đà Lạt 9 lâm Đồng). Pôa Phan Đình Trạc Ngế cheăng tung tíu xiâm tơnêi têa ƀă mâu kăn kong pơlê Lâm Đồng veăng hôp. A rôh trâm mâ, kuăn pơlê tối loi khât ƀă tơngah a mâu tơdroăng pơkâ tung mơnhông mơdêk cheăng kâ - rêh ối dêi kong pơlê ƀă tơnêi têa.

Tung mâu tơdroăng pâ thế, mâu kuăn pơlê xuân tối tơngah vâ ai troăng kân tơdrăng tơdjêp ƀă Đà Lạt ƀă mâu kong pơlê peăng Hdroh rĕng châ tơbleăng pêi, tơdroăng pơkâ, ‘no liăn mơjiâng tơmeăm khoăng châ tơmâng khât tâ rĕng ai troăng rơhlâ tơniăn xiâm têa ton ta ah.

Pôa Phan Đình Trạc - Ngế cheăng tung khu xiâm kal kí, Kăn hnê ngăn Tíu xiâm Đảng, ngế cheăng tung tíu xiâm tơnêi têa hiăng tơmâng xo mâu tơdroăng veăng hnê tối dêi kuăn pơlê ƀă tối kô pơtroh ăm mâu kơ koan râ kơpêng.