Tung rôh lăm pôu păng ‘nâng Ấn Độ, Đăi tươ̆ng Phan Văn Giang, Ngế cheăng tung tíu xiâm pơkuâ tơdroăng kal kí, kăn xiâm phŏ pơkuâ hnê ngăn Đảng lêng Tơnêi têa, Ngế xiâm pơkuâ ngăn lêng pơkuâ djâ khu kăn xiâm dêi Khu xiâm pơkuâ ngăn lêng Việt Nam hiăng troh koh hmât, tơpui tơno ƀă jâ Droupali Murmu, kăn xiâm ngăn lêng kong têa Ấn Độ a pơlê kong xiâm New Delhi.

Tơpui a rôh trâm mâ, pôa Phan Văn Giang tối nhên Việt Nam đi đo ngăn nhuô̆m tơdroăng ‘mâi mơnhông ƀă mơdêk tơrŭm cheăng khôi hmâ, ƀă tơrŭm cheăng tung la ngiâ tơrŭm tung tâi tâng mâu kơvâ cheăng ƀă Ấn Độ hiăng châ kăn xiâm hnê ngăn tơnêi têa Hồ Chí Minh prếi pôa Jawaharlal Nehru pơkâ tơdroăng ki kal ƀă châ rơxông mâu kăn pơkuâ, kuăn pơlê péa tơnêi mơ’no hên ivá tơbêng.

Kăn xiâm pơkuâ kong têa Ấn Độ tối rôh lăm pôu kố kô bro tơrŭm thăm rế krá tâ tung tơrŭm cheăng pơla kong têa tung la ngiâ dêi hnoăng tơrŭm tung tâi tâng pơla péa tơnêi têa. Mơnhên tối khât klêi kơ’nâi pêi pro châ tơƀrê rôh hôp pơla péa Khu xiâm pơkuâ ngăn lêng dêi péa tơnêi têa. Kăn xiâm pơkuâ kong têa Ấn Độ tối nhên, tơrŭm cheăng pơla péa pâ pơtối mơdêk ivá mơnhông tơƀrê, tơrŭm ai pơxúa, tơƀrê, veăng kum kal khât tung tơrŭm cheăng pơla péa tơnêi têa.