Kố cho rôh apoăng kăn xiâm pơkuâ hnê ngăn Đảng Kŏng san Việt Nam lăm pôu kong têa Canada sap ing péa tơnêi têa mơjiâng tơrŭm cheăng tơpui kâ hơnăm 1973. Klêi kơ'nâi lối tơdế chal mơjiâng tơrŭm cheăng tơpui kâ ƀă vâ chê 10 hơnăm tơbleăng túa tơrŭm cheăng tŭm têk, Việt Nam ƀă Canada hiăng mơjiâng tơdroăng tơrŭm cheăng rế hía rế krá tơniăn.

Péa tơnêi têa ai hên tơdroăng ki rơdêi tơtro dêi pó: Việt Nam dế mot tung chal mơnhông nếo, mơnhên khoa hok - kong ngê̆, pơhlêh nếo tơmiât pêi rơkê, pơhlêh kơxô̆ ƀă tơrŭm cheăng lâp plâi tơnêi trâu rơdâ; Canada dế mơdêk hên kơchơ mơdró ƀă thăm tơrŭm ƀă kơpong Ấn Độ Dương - Thái Bình Dương.

Hneăng lăm pôu roh kố dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa kô mơjiâng ivá kal kí rơdêi, djâ tơrŭm cheăng Việt Nam - Canada mơnhông tơƀrê, tơdâng tơ'mô ƀă châ tơƀrê tâ nếo, tơxâng ƀă tơmeăm ki ai hlâu, ki rơdêi ƀă tơdroăng kal vâ dêi péa tơnêi têa.

Tơdrêng amê, hneăng lăm pôu xuân kô po môi hneăng mơnhông mơdêk ton xŏn ƀă tâi tâng tâ pơla péa tơnêi têa, veăng kum kal khât ăm hơniâp lĕm, tơniăn a kơpong ƀă tung lâp plâi tơnêi.