Kăn xiâm pơkuâ hnê ngăn cheăng Đảng khĕn kơdeăn tơdroăng pêi tơƀrê tung tơbleăng pêi dêi péa to kong pơlê, la mơhno nhên tơrŭm cheăng pơla Kiên Giang ƀă An Giang tá hâi mơnhông tơƀrê, maluâ ối achê ƀă dêi rơpó tung kơpong ki xiâm Tây Nam Bộ. Kăn xiâm pơkuâ hnê ngăn cheăng Đảng pơkâ thế ‘mot tơkŭm péa to kong pơlê vâ mơjiâng môi tơdroăng tơkŭm mơnhông nếo ai túa pơkâ cheăng kân, kng kế, nhâ loăng hên ƀă ivá tơrŭm kơpong tơƀrê tâ.

Tơdroăng ki tơkŭm kố xuân pro tơ’lêi hlâu tơdroăng ki mơjiâng hngêi trăng troăng klông, mơjiâng tơdroăng kơnía tơrŭm sap ing mơjiâng troh tê ngi kong têa ê, tơ’mot ‘no liăn cheăng tung la ngiâ ƀă mơdêk ivá tơxup tơbriât kơpong. Kăn xiâm pơkuâ hnê ngăn cheăng Đảng pơkâ thế péa kong pơlê tơkŭm pêi pro klêi mâu tơdroăng pơkâ hơnăm 2020 – 2025, hbrâ krâu ăm Hneăng hôp Đảng ƀô̆ rêm râ, tơmiât troh hneăng hôp lâp tơnêi têa rôh má 14 dêi Đảng.