Tối nhên, kơxô̆ liăn vâ ‘no pêi cheăng tung la ngiâ gá hên, pơkâ thế mơ’no cho xúa kơxô̆ liăn tơƀrê, pôi tá ăm ai tơdroăng kâ kơluâ, kâ kơhveăm, pro mơhrê liăn, pôa Tô Lâm, kăn xiâm pơkuâ hnê ngăn cheăng Đảng pơkâ thế rêm râ pơkuâ Đảng, khu tơrŭm cheăng Đảng, kơ koan cheăng ki ai tơdjâk pơtối tơkŭm pơkuâ, hnê mơhno tơbleăng pêi tơƀrê mâu tơdroăng cheăng, ƀă túa tơmiât cho khŏm mơeăm, kơhnâ, tơpui iâ pêi hên, pro pơhlêh tơdroăng pêi pro ki khât vâ kuăn pơlê hlo, kuăn pơlê loi, kuăn pơlê môi tuăn.

Pơchân ‘na mâu tơdroăng cheăng ki kal tung la ngiâ, pôa Tô Lâm, Kăn xiâm pơkuâ hnê ngăn cheăng Đảng pơkâ thế tơkŭm pêi pro pơhlêh mâu troăng hơlâ, túa tơmiât dêi pêi dêi Đảng ‘na pơxâu phak mâu ngế ki pro xôi kâ kơluâ, pro mơhrê liăn ngân; thăm séa ngăn hnoăng cheăng pơkuâ tro ƀă tơdroăng ki pro rế lĕm kăn pơkuâ kong pơlê péa râ; mơdêk rĕng tơdroăng ki séa ngăn, pơxâu phâk troh tui lui mâu ngế pro xôi, tơdroăng ki châ kuăn pơlê kal vâ ‘nâi. Pôa Tô Lâm, Kăn xiâm pơkuâ hnê ngăn cheăng Đảng xuân pơkâ thế mơdêk rơdêi hbrâ mơdât kâ kơluâ, pro mơhrê liăn ngân tro ƀă tơdroăng pơkâ thế mơnhông.