Rôh lăm pôu sap nah tá hâi chói ai kố troh a Kazakhstan dêi pôa Tô Lâm, Kăn xiâm pơkuâ hnê ngăn cheăng Đảng châ tơngah kô ăm tơrŭm cheăng pơla péa pâ tâk troh a môi troăng ki nếo ƀă hên hĭn mâu hlá mơ-éa tơrŭm cheăng ki kal tung hên kơvâ cheăng kô châ kĭ.

Tiô tối hdrối, tung rôh lăm pôu kố dêi pôa Tô Lâm, Kăn xiâm pơkuâ hnê ngăn cheăng Đảng, péa tơnêi têa kô tối tơbleăng ‘na tơrŭm cheăng a môi troăng ki nếo, tơtro ƀă púi vâ ƀă pơxúa dêi kuăn pơlê péa tơnêi têa. Tiô tơdroăng klêi kơ’nâi mơgêi mâu tơdroăng cheăng a Kazakhstan, pôa Tô Lâm, kăn xiâm pơkuâ hnê ngăn cheăng Đảng rơtế ƀă kơdrâi pôa ƀă Khu râ kăn xiâm tơnêi têa kô pôu Tơnêi têa Kŏng hòa Azerbaijan, pôu păng ‘nâng kong têa Rusi ƀă veăng ai mâ Leh tơbâ 80 hơnăm Hâi Ƀlêi râng tung rôh tơplâ rak vế tơnêi têa khên tơnôu ƀă pôu râ Tơnêi têa Kŏng hòa Belarus troh hâi lơ 12/5/2025.