Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa sôk ro mâu grup pơkuâ kân dêi Siam po rơdâ mơ’no liăn cheăng, tê mơdró a Việt Nam, ki má lối tung mâu kơvâ ki tơtro ƀă tơdroăng kal vâ mơnhông dêi Việt Nam ƀă ai ivá mơjiâng tơ’nôm ki kơnâ ăm tơrŭm cheăng pơla péa pâ.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối rơdêi, Việt Nam nhuô̆m tơrŭm cheăng Khu tơrŭm ton xŏn tâi tâng ƀă kong têa Siam, tung mê tơrŭm cheăng kâ, tê mơdró, mơ’no liăn cheăng tơdjêp khu tê mơdró cho xiâm kối ki kal, gum mơdêk tơtêk krá tơniăn ƀă thăm tơdjêp pơla péa kong têa cheăng kâ.

Mơnhên tơdroăng mơ’no liăn cheăng, tê mơdró dêi Grup pơkuâ TCC a Việt Nam tung mâu hơnăm hiăng hluâ, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơhnhôk Grup pơkuâ pơtối mơ’no liăn cheăng, mơnhông tơdroăng tê mơdró a Việt Nam tiô troăng mơdêk ivá pơkuâ, mơdêk xúa khoa hok ƀă kŏng ngê̆, pơhlêh nếo tơmiât pêi rơkê, rak vế kong prâi ƀă veăng tơlo hên ăm pơlê pơla.

Xuân tung tơdroăng lăm pôu pêi cheăng kong têa Siam, hdrối mê, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng troh têk nhâng a Kơpong Chôu ‘măn tơmeăm khoăng rôh ton nah Pôa Hồ Chí Minh, Kăn xiâm hnê ngăn tơnêi têa hneăng apoăng ƀă trâm mâ kuăn pơlê a kong têa Siam xiâm rêi Việt Nam dế rêh ối pêi cheăng a kơpong Peăng mâ hâi lo Pá kơnhŏng kong têa Siam.