A hneăng hôp, kuăn pơlê tối hên tơdroăng ki tơdjâk troh tơdrêng troh tơdroăng rêh ối môi tiah tơnêi tơníu, pơkâ pêi, hnê hriâm, khăm pơlât, troăng klông, hyôh kong prâi ƀă tơniăn krúa kế kâ. Kuăn pơlê xuân pâ thế mâu tơdroăng tơkêa bro mơnhông mơdêk tung kong pơlê athế rak tơniăn hnoăng pơxúa, tơdroăng rêh ối ton xŏn dêi kuăn pơlê, malối cho tung tơdroăng tăng tơnêi, chêl thiê̆n ƀă xĕn ối tíu ê.

'Na tơniăn krúa kế kâ, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế séa ngăn kơtăng sap ing tơdroăng mơjiâng pro troh tê, mơdêk tí tăng 'nâi xiâm kối, pơxâu phâk kơtăng kế kâ ki ôh tá xê khât, kế kâ ki ôh tá krúa, ôh tá ăm ai tơdroăng ôh tá tơniăn tung pơkuâ ngăn.

Ƀă mâu tơdroăng ki kuăn pơlê tơpui tối, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế kơ koan cheăng mơnhên inhên ngế ki pôu râng hnoăng cheăng, hâi khế tơpui ƀă pêi pro ƀă tối ‘na tơdroăng châ tơƀrê pơtối vêh tơpui tơno dêi kuăn pơlê. Mâu tơdroăng ki tơkâ luâ hnoăng pơkuâ kal châ tơkŭm, tơbleăng ƀă Kuô̆k hô̆i, Chin phuh ƀă mâu kơ koan Tơnêi têa, tơdrêng amê hlối séa ngăn, mơnhên tơdroăng pêi pro.