Kơxo lơ 2/3, a Tíu pêi cheăng xiâm Đảng, pôa Tô Lâm, Kăn xiâm pơkuâ hnê ngăn Đảng pơkuâ rôh pêi cheăng ƀă Khu cheăng tung tơnêi têa ƀă mâu kơ koan ki ai tơdjâk troh vâ hmâng ƀă tối ‘na tơdroăng tơkêa “Mơgêi 20 hơnăm pêi pro Pơkâ Tơnêi têa 3 hneăng X ‘na thăm mơnhông tơdroăng pơkuâ dêi Đảng ƀă cheăng hbrâ mơdât kâ kơluâ, kơhveăm, pro mơhrê liăn ngân; pơtroh ăm Khu pơkuâ ngăn cheăng Tơnêi têa ngăn, pơkâ tơdroăng ‘na cheăng hbrâ mơdât kâ kơluâ, kâ kơhveăm liă ngân tung hneăng ki nếo”.

Tơpui mơgêi rôh pêi cheăng, pôa Tô Lâm, Kăn xiâm pơkuâ hnê ngăn Đảng tối nhên, hbrâ mơdât kâ kơluâ, kâ kơhveăm, pro mơhrê liăn ngân cho tơdroăng cheăng ki kal, athế pêi đi đo, ton xŏn dêi cheăng mơjiâng, ‘mêng rơnêu Đảng ƀă khu cheăng kal kí. Khŏm mơ-eăm plâ mơdât mâu tơdroăng kâ kơluâ, kâ kơhveăm, pro mơhrê liăn ngân cho troăng hơlâ pêi ki đi đo, môi tuăn dêi Đảng, Tơnêi têa pin.

Xua mê, tơdroăng pơkâ tơdroăng ‘na thăm mơnhông tơdroăng pơkuâ dêi Đảng ƀă cheăng hbrâ mơdât kâ kơluâ, kâ kơhveăm pro mơhrê liăn ngân tung hneăng ki nếo tơdrêng a Rôh hôp Tơnêi têa 2 hneăng XIV, tối rơdêi tơdroăng ki tơmâng ngăn dêi Đảng ki tơmâng ngăn dêi Đảng, cho rơkong tối tơbleăng dêi Đảng ‘na pơtối khŏm mơ-eăm, kơhnâ mơdêk rơdêi cheăng plâ mơdât “mâu tơdroăng pêi pro ôh tá tro tung tơnêi têa” tung hneăng la ngiâ ƀă túa tơmiât, túa pêi nếo.