Drêng troh tơbâ hâi mơjiâng luât Việt Nam lơ 9/11/2024, kơxo hâi lơ 7/11 a Hà Nội, pôa Tô Lâm - Kăn xiâm pơkuâ hnê ngăn Đảng hiăng lăm pôu ƀă pơkuâ rôh pêi cheăng ƀă Khu kăn xiâm Đảng ƀô̆ ‘na Luât ‘na tơdroăng cheăng pơkuâ, hnê mơhno pêi pro tơdroăng cheăng dêi khu xiâm ing apoăng hneăng troh nôkố ƀă troăng hơlâ pêi tâi hneăng hôp má 13 dêi Đảng.

A rôh pêi cheăng, pôa Tô Lâm, teăng kăn xiâm Đảng, Tơnêi têa pơtroh rơkong rơkâu ki lĕm má môi troh khu kăn ƀô̆, kŏng chưk, viên chưk mơngế pêi cheăng dêi Khu xiâm ngăn ‘na Luât  kơvâ cheăng ‘na luât tung lâp tơnêi têa. Vâ tơnêi têa xông prôk mot tung mâu hơnăm ki nếo, rĕng pê klêi mâu pơkâ ki Đảng hiăng pơcháu, pôa Tô Lâm - Kăn xiâm pơkuâ hnê ngăn Đảng pơkâ thế, tung la ngiâ, Khu xiâm mơjiâng luât tối tơdjuôm ƀă kơvâ ngăn ‘na luât tơkŭm pơhlêh nếo tơdroăng cheăng mơjiâng luât tiô hnoăng cheăng ai pơcháu, vâ troh pơkâ mơ- eăm mơnhông mâu luât cho kring vế hnoăng ki pơxúa tro luât dêi mâu ngế ƀă tơkŭm; rak tơniăn pơlê pơla; mơhnhôk mơnhông cheăng kâ, rêh ối; tơniăn tơdâng tơ’mô ƀă ôh tá pơrah pơlê pơla; hmâ ƀă tơdroăng mơnhông dêi pơlê pơla; tơdrăng ƀă tơ’lêi achê; ƀă hlối tơrŭm nhên krá; veăng mơjiâng pơlê pơla rơkê plĕng, tơtro, ƀă mơnhông tơƀrê.