Tiô tơbleăng a roh hôp, pêi pro Tơdroăng pơkâ kơxô̆ 55 dêi Khu xiâm pơkuâ hnê ngăn cheăng Đảng, Khu xiâm kal kí, Khu pơkuâ hnê ngăn cheăng Đảng, Chin phuh hbrâ hnê mơhno rĕng tơdroăng tơkŭm po Têt Bính Ngọ hơnăm 2026 ƀă đi đo hnê mơhno, mơhnhôk tơdroăng pêi pro.

Mơgêi roh hôp, pôa Tô Lâm, Kăn xiâm pơkuâ hnê ngăn Đảng kheăn kơdeăn hiâm mơno pôu râng hnoăng cheăng mâu khu râ kăn pơkuâ hnê ngăn cheăng Đảng, Khu tơrŭm Đảng, khu râ kăn pơkuâ, Măt trâ̆n Tơnêi têa, khu lêng dêi kăn ƀô̆, kŏng chưk, viên chưk, mơngế pêi cheăng hiăng tơkŭm pêi pro kơtăng hnê mơhno dêi Khu pơkuâ hnê ngăn cheăng Đảng, tơniăn ăm kuăn pơlê tơdah Têt hâk ro.

Laga, hnoăng cheăng a ngiâ cho hngăm, Kăn pơkuâ hnê ngăn Đảng pơkâ khu cheăng kal kí thế rup kŏng pêi tơdroăng cheăng. Krê tung pái khế apoăng hơnăm kố, Kăn pơkuâ hnê ngăn Đảng pơkâ, thế kêi đeăng tơdroăng hlê plĕng ƀă pêi pro tơdroăng mơjiâng, tơ’nôm Tơdroăng cheăng pêi pro Tơdroăng pơkâ Hneăng hôp 14 tung tâi tâng Đảng; tơkŭm po châ tơƀrê roh tâ phĭu kăn teăng mâ Kuô̆k hô̆i hneăng má 16, Hô̆i đong kuăn pơlê mâu râ hneăng hơnăm 2026 – 2031 a hâi lơ 15/3 la ngiâ.