Mơgêi roh hôp, pôa Tô Lâm, Kăn xiâm pơkuâ hnê ngăn Đảng kheăn kơdeăn 5 tơdroăng ki châ tơƀrê ki kal dêi khu Kŏng an kuăn pơlê hiăng châ tơƀrê tung pơla kố nah ƀă hên troăng pêi ki rơkê, tơmiât pêi rơkê, tơtro ƀă tơdroăng nôkố tung pêi pro troăng hơlâ  lĕm dêi Đảng, Tơnêi têa ‘na rêh ối pơlê pơla, môi tiah: Hbrâ kĭ, tơdah hnoăng cheăng mơjiâng 15 hngêi trung a mâu kong pơlê kơpong kong ngo, cheăm tơkăng kong, hriăn plĕng, mơjiâng 3 hngêi trung phôh thông tơdjêp râ ai tíu kâ koi ối pơtê tung hngêi trung hnê vâi hdrêng ai tơdroăng rêh ối pá puât, vâi hdrêng kuăn pơlê hdroâng kuăn ngo, tŏng gum Điện Biên ôh tá ăm ai xếo kơpong ki ôh tá ai on tơhrik ta hên thôn kuăn pơlê hdroâng kuăn ngo Mông.

Tối ‘na trăng pêi cheăng hnoăng cheăng tung la ngiâ, pôa Tô Lâm, Kăn xiâm pơkuâ hnê ngăn Đảng pơkâ thế, Đảng ủi Kŏng an Tơnêi têa ƀă Khu xiâm Kŏng an kal môi tuăn hlê plĕng ‘na pơkâ hên rak vế Đảng, rak vế rơxông, gâk kring tơnêi têa tung hneăng pơhlêh nếo, păng ‘nâng ôh tá ăm tơnêi têa pêi pro ti tro kô tuăn tơná, kơdrâ ‘na troăng pêi cheăng ton xŏn.