Hâi lơ 21/6, a Hà Nội, Đăi tươ̆ng Tô Lâm, Ngế cheăng tung khu xiâm kal kí, Ngế xiâm pơkuâ Kŏng an hiăng hôp tơpui tơno ƀă pôa Kim Jong-uk, Ngế xiâm pơkuâ Kơ koan Kăn sát têa kơxĭ Hàn Quốc dế lăm pôu pêi cheăng a Việt Nam. Vâ mơdêk tâ nếo tung tơrŭm cheăng pơla péa pâ a la ngiâ, a rôh hôp, péa pâ hiăng vâ môi tuăn kô tơbeăng mâu tơdroăng cheăng tơrŭm pêi ki kal ki Hàn Quốc ai rơdêi hlối tơtro ƀă tơdroăng púi vâ dêi Khu xiâm Kŏng an.

Tơkŭm po mâu tơdroăng hriâm, hnê mơdêk hnoăng cheăng kăn sát troăng têa, Khu xiâm kŏng an Việt Nam vâ pro xiâm pơkuâ tuk lăm séa ngăn xua Kăn sat têa kơxĭ Hàn Quốc tŏng kum. Hlối tơpui tơno hnê tối ăm dêi rơpó ‘nâi mâu tơdroăng cheăng dêi Kăn sát kring vế, gak ngăn têa kơxĭ Hàn Quốc ƀă Kăn sát gak troăng prôk Việt Nam. Ing mê, pơkâ mâu tơdroăng tơrŭm cheăng nhên vâ tơdroăng tơrŭm pơla péa pâ rế tơƀrê trâu rơdâ, tơxâng ƀă tơmeăm khoăng ai hlâu dêi péa kơ koan.