Kơxê hâi lơ 15/5, a Hà Nội, Khu xiâm Kŏng an tơkŭm po leh tơdah Khu kăn xiâm Kăn sát kong têa Cuba xua Ngế xiâm pơkuâ kăn sát Cuba pro xiâm pơkuâ djâ khu kăn lăm pôu pêi cheăng a Việt Nam. Klêi leh tơdah, péa ngế xiâm hôp tơpui tơno. Koh hâk khu kăn xiâm xua Ngế xiâm pơkuâ kăn sát kong têa Cuba lăm pôu khât ƀă hlối pêi cheăng ƀă Khu xiâm kŏng an Việt Nam, pôa Tô Lâm tối nhên, hlo tơdroăng mơngế ki ai xôi, malối cho xôi tơkâ luâ kong têa, tơdroăng xôi  xúa kơmăi ki nếo nôkố ƀă mâu tơdroăng xôi ki ê, rế ton rế pơkí kí ƀă pá vâ châ ‘nâi, tơdroăng po rơdâ ƀă mơdêk tơrŭm cheăng pơla Khu xiâm Kŏng an Việt Nam ƀă Khu xiâm kăn sát Cuba thăm rế kal pêi tơdrêng xua vâ pro pơxúa  ƀă vâ tơniăn tơrêm kong têa.

A rôh hôp, péa pâ hiăng vâ môi tuăn: mơdêk tơpui tơno, hnê tối, hbrâ tơmeăm ƀă hnê mơdêk ivá cheăng ăm mâu lêng ki kring gak, malối hnê mâu kih thuât kring vế hbrâ mơdât, châ ’nâi, mơdât tí tăng hriăn plĕng dêi khu ‘mêi; tơbleăng tơrŭm tí tăng ‘nâi plĕng mơjiâng pro mâu túa pơkeăng, vaccine, mâu kế tơmeăm sinh hok, tung mê ai mâu túa pơkeăng hiăng tí tăng hriăn plĕng pro klêi ƀă châ xúa tung pơlât ăm mơngế châi tamo a Cuba ƀă hía hé.