Hâi lơ 29/6, Khu kăn ki pêi dêi hnoăng cheăng dêi Khu xiâm ngăn Kŏng an xua Đăi tươ̆ng Tô Lâm, ngế xiâm ngăn Kŏng an pơkuâ djâ khu kăn kố hiăng troh pôu kơ-êng, mơhnhôk mâu rơpŏng dêi mâu ngế ki hlâ drêng pêi dêi hnoăng cheăng a tơring Čư̆ Kuiñ (kong pơlê Dak Lak), a kơxo má hâi lơ 11/6. Pôa Tô Lâm ƀă Khu kăn ki pêi dêi hnoăng cheăng hiăng troh pôu kơ-êng, mơhnhôk rơpŏng mâu kăn ƀô̆ ki hlâ, mê cho: Thiê̆u tă Hoàng Trung (kot mâ hơnăm 1981).

Đăi ŭi Nguyễn Đăng Nhân (kot mâ hơnăm 1994) cho kăn ƀô̆ Kŏng an cheăm Ea Ktur; Thiê̆u tă Trần Quốc Thắng (kot mâ hơnăm 1989) ƀă Đăi ŭi Hà Tuấn Anh (kot mâ hơnăm 1991), kăn ƀô̆ Kŏng an cheăm Ea Tiêu; Pôa Nguyễn Văn Kiên, Kăn pơkuâ ngăn Đảng, Kăn hnê ngăn Hô̆i đong cheăm Ea Ktur ƀă pôa Nguyễn Văn Dũng, kăn hnê ngăn Vi ƀan cheăm Ea Tiêu.

 A hngêi mâu ngế ki hlâ kố, pôa Tô Lâm ƀă khu kăn ki pêi dêi hnoăng cheăng hiăng chôu nhang tơbâ troh mâu vâi pú, mâu kăn ƀô̆, lêng ‘na tơdroăng ki châi heăng kố, pôa Tô Lâm tối nhên, Đảng, Tơnêi têa, Khu xiâm ngăn Kŏng an đi đo tơmâng ngăn, pêi pro tro troăng hơlâ tŏng kum ƀă kăn ƀô̆ Kŏng an ki hlâ. Pôa Tô Lâm pơkâ thế mâu kơ koan ki ai tơdjâk troh kong pơlê Dak Lak kal tơmâng ngăn, tŏng kum ‘na tơdroăng rêh ối, hiâm mơno ƀă mâu rơpŏng ki ai mâu ngế hlâ. Pôi tá lôi nhŏng o rơpŏng hngêi mâu ngế ki kố athế trâm tơdroăng trâm pá puât.

Drêng rôh lăm pôu kơ-êng, mơhnhôk mâu rơpŏng hngêi nhŏng o dêi mâu ngế ki hlâ, pôa Tô Lâm hiăng diâp kơxô̆ liăn ai 500 rơtuh vâ bro hngêi hiâm mơno chôu pâ ăm nhŏng o rơpŏng hngêi 2 ngế ki hlâ cho Thiê̆u tă Hoàng Trung prế  Tiê̆u tă Trần Quốc Thắng; diâp kơxô̆ liăn kơdĭng kơnâ 500 rơtuh liăn ăm mâu rơpŏng ki ai ngế hlâ, châ xo ing kơxô̆ liăn hbrâ tơplâ mơdât khu ‘mêi.