VOV4.Xơ Đăng - Kơmăng lơ 17/8, Đảng ƀô̆, Khu râ kăn pơkuâ bêng Quán Thánh, pơlê kân Ba Đình, pơlê kong kân Hà Nội tơkŭm po ‘’Hâi leh tâi tâng kuăn pơlê gâk kring tơnêi têa’’. Đăi tươ̆ng Tô Lâm, Ngế xiâm pơkuâ Kŏng an troh veăng ƀă xông tơpui a hâi leh. 17 hơnăm hiăng hluâ, ‘’Hâi leh tâi tâng kuăn pơlê gâk kring Tơnêi têa’’ dêi bêng Quán Thánh hiăng châ pêi pro ƀă hên tơdroăng, tơxâng tiô tơdroăng kal vâ, châ tơƀrê ƀă troh lâp lu, ing mê, mơnhông mơdêk ivá ó rơdêi tâi tâng tá khu cheăng kal kí tung pêi pro hnoăng cheăng gâk kring Tơnêi têa, tơniăn pơlê pơla.

Pôa Tô Lâm, Ngế xiâm pơkuâ kŏng an xông tơpui a hâi leh

Xông tơpui a hâi leh, pôa Tô Lâm mơnhên ƀă kheăn kơdeăn mâu tơdroăng châ tơƀrê dêi kăn ƀô̆, kuăn pơlê bêng Quán Thánh hiăng châ tơƀrê tung mơjiâng tơdroăng tâi tâng kuăn pơlê gâk kring tơnêi têa tung pơla kố nah. Ngế xiâm pơkuâ kŏng an tối ing tơdroăng pêi Hâi leh tâi tâng kuăn pơlê gâk kring tơnêi têa ăm hlo tơdroăng ki phiu ro, sôk xua, hiâm mơno rŭm môi tuăn ƀă tơdroăng veăng tŏng kum, loi tơngah dêi kuăn pơlê tung tơdroăng pơkuâ dêi mâu khu râ kăn pơkuâ hnê ngăn cheăng Đảng ƀă khu râ kăn pơkuâ ƀă Khu kŏng an kong pơlê; kuăn pơlê châ mơnhông mơdêk hnoăng pơkuâ xêh, tuăn tơmiât rơkê ƀă tơdroăng ki veăng xêh tung tơdroăng tâi tâng kuăn pơlê gâk kring tơnêi têa mơjiâng ivá ó rơdêi kân, kum gâk kring tơniăn tung rêm tơdroăng.

            A Sa Ly tơplôu ƀă tơbleăng