Kăn xiâm pơkuâ hnê ngăn Đảng tối rơdêi, klêi kơ’nâi 66 hơnăm pêi pro tiô rơkong pơchân tối dêi Pôa Hồ Chí Minh, Kăn xiâm hnê ngăn tơnêi têa hneăng apoăng, Têt pêt loăng hiăng chiâng khôi túa lĕm, gum pro pơhlêh ngiâ méa tơnêi têa, pro lĕm kong prâi nhâ loăng ƀă mơdêk lĕm tơdroăng rêh ối dêi kuăn pơlê.

Pêt tơ’nôm môi xiâm loăng drêh cho pơtroh tơ’nôm tơdroăng loi tơngah môi tơdroăng la ngiâ châ mơnhông mơdêk krá tơniăn. Mơnhên troăng tơmiât đi đo dêi Đảng ƀă Tơnêi têa cho mơnhông cheăng kâ ôh tá pro ‘mêi kong prâi, mơjiâng tíu rêh ối tê mơdró cheăng kâ tiô rơxông nếo laga thế rak ‘’hlá xôu ki drêh’’, Kăn xiâm pơkuâ hnê ngăn Đảng pơkâ thế pơlê kong xiâm thế ví mơhno to a ngiâ, pêi mơhno to pa kong tê, mơ’nhê tê kơtê, mê pơkal athế rak tơniăn lĕm “pêt loăng ki lâi, rêh loăng ki mê’’.

Tơdroăng pêt loăng thế tiô pơkâ, rak ngăn ton xŏn, tơdâng tơ’mô ƀă mơjiâng hngêi trăng, troăng klông tíu kuăn pơlê rêh ối tê mơdró krúa lĕm kong prâi, rơkê. Tiô pơkâ pêi, troh mơ’nui khế 3, Hà Nội mơ-eăm pêt 80.000 – 100.000 xiâm loăng drêh ƀă dâng 400.000 xiâm loăng plâ hơnăm 2026.