A Hà Nội, Khu xiâm ngăn Kŏng an tơkŭm po Rôh hôp tơpui tơno vâ mơnhên tối tơdroăng cheăng kŏng an khế 5, hnoăng cheăng ki kal khế 6/2023. Đăi tươ̆ng Tô Lâm, ngế xiâm ngăn Kŏng an pơkuâ po Rôh hôp. Tung khế, Kŏng an mâu tíu pêi cheăng, kong pơlê hiăng séa ngăn lối 3 rơpâu rôh pro xôi ‘na tơniăn tung pơlê pơla, rup lối 6 rơpâu 300 ngế.

Hiăng hnê mơhno châ hlo lối 2 rơpâu rôh, 3 rơpâu 469 ngế pro xôi ‘na ma tŭi, rup xo lối 67 kg heroin, lối 217kg ƀă lối 89 rơpâu pŭm ma tŭi tŭm túa. Tơpui mơgêi Rôh hôp, pôa Tô Lâm, ngế xiâm ngăn Kŏng an pơkâ thế Kŏng an mâu tíu pêi cheăng, kong pơlê kal pêi pro tro hnoăng cheăng gâk kring tơnêi têa, hbrâ rơnáu séa ngăn tơdroăng a kong têa ê, tung kơpong vâ teăm tí tăng ‘nâi plĕng ăm Đảng, Tơnêi têa mâu troăng hơlâ pơkâ tơtro.

Rak vế tơniăn gâk kring tung tơnêi têa, gâk kring tơdroăng cheăng kâ, gâk kring tung măng, gâk kring tơdroăng kal kí, tơdroăng ki mot lo ngi kong têa ê. Mơdêk tơdroăng ki séa ngăn mâu ngế ki pro xôi ối tung Khu hnê mơhno Tơnêi têa ‘na hbrâ mơdât mâu ngế bro xôi, malối “mâu ngế pro xôi a troăng kơphô̆”, mâu ngế bro xôi “ăm mung liăn xo laih hên”, mâu ngế bro xôi tung măng; tơkŭm tơplâ mơdât tơƀrê ƀă mâu ngế ki bro xôi ‘na ma tŭi.