Tơdroăng ki kal dêi rôh hôp cho tơkŭm tung séa ngăn cheăng pơkuâ, hnê mơhno tơbleăng pêi pro Pơkâ kơxô̆ 01 dêi Khu xiâm cheăng kal kí ‘na hriăn ngăn, hriâm tâp, pơkâ pêi pro, hnê tối ƀă tơbleăng pêi Tơdroăng pơkâ Hneăng hôp rôh má 14 dêi Đảng ƀă tơdroăng Pơkâ kơxô̆ 46 dêi Khu xiâm ngăn cheăng kal kí ‘na pơkuâ rôh tâ phĭu pôk kăn Kuô̆k hô̆i hneăng 16 ƀă tâ phĭu pôk kăn Hô̆i đong hnê ngăn kuăn pơlê rêm râ pơla hơnăm 2026 - 2031.

Klêi kơ’nâi hmâng pơchuât tơbleăng dêi Khu pơkuâ ngăn Đảng ủi Kuân đoàn 12 ƀă hên tơdroăng hiăng pêi pro klêi tơƀrê, tơpui hnê mơhno a Rôh hôp, pôa Trần Cẩm Tú pơkâ thế: Má môi, cho athế pơtối pơkâ pêi kơtăng trâu hngế Pơkâ kơxô̆ 01 dêi Khu xiâm kal kí ƀă séa ngăn mâu túa pơkâ pêi cheăng, túa pơkuâ, tung mê ai túa pơkuâ mâu tơdroăng cheăng ki kal.

Má péa, mê cho tơdroăng cheăng kơpong tâ phĭu kuăn pơlê dêi kuân đoân veăng tâ phĭu gá hên a kong pơlê ki kân rơdâ. Pơkâ thế mâu kăn kal pơtối pêi pro kơtăng tơdroăng pơkâ kơxô̆ 46 dêi Khu xiâm ngăn cheăng kal kí lăm ngăn tâi tâng tơdroăng cheăng hbrâ ăm rôh tâ phĭu vâ rak vế tơniăn krâu, nhên pêi tro tiô luât, tro hnoăng dêi kuăn pơlê.