Tung roh lăm pôu pêi cheăng veăng hneăng hôp khu râ kăn xiâm ‘na Tơkêa ‘na liăn ngân lâp plâi tơnêi bă pêi cheăng a Kŏng hoa Pơhlăng, hâi lơ 21/6, pôa Trần Hồng Hà, Ngế pro xiâm phŏ hnê ngăn Chin phuh hiăng troh lăm pôu pêi cheăng Kơ koan mơnhông mơdêk kong têa Pơhlăng (AFD) ƀă ai roh pêi cheăng jâ Marie Helene Loison, Kăn phŏ pơkuâ AFD, ƀă mâu khu râ kăn xiâm AFD.

A roh pêi cheăng, Ngế pro xiâm phŏ hnê ngăn Chin phuh tối phiu ro mâu tơdroăng mơnhông mơdêk tung tơrŭm cheăng pơla Việt Nam – Pơhlăng, ki rơhêng vâ tối tung tơrŭm cheăng kâ, môi tơdroăng ki xiâm tung tơrŭm cheăng ton xŏn péa tơnêi têa. Péa pâ môi tuăn thăm tơrŭm tâ mê nếo pơla AFD ƀă Việt Nam tung hơ’lêh hyôh kum tơdroăng rêh ối, ki má lối tung pơla Việt Nam hiăng ai mâu tơkêa ó rơdêi a Hneăng hôp COP26 ƀă pêi pro tơrŭm cheăng khu tơrŭm cheăng hơ’lêh hyôh kum tơdroăng rêh ối tơdâng; pơtối tơrŭm pêi pro châ tơƀrê mâu tơdroăng tơkêa bro cheăng kâ kum ăm mơnhông krá tơniăn a Việt Nam.