Kơxo lơ 31/5, a Tíu pêi cheăng Chin phuh, pôa Trần Hồng Hà, Ngế pro xiâm phŏ hnê ngăn tơnêi têa tơdah Kăn teăng mâ Mih a Việt Nam pôa Marc E. Knapper ƀa Kăn teăng mâ pôu râng tâi tâng hnoăng kong têa Hà Lan a Việt Nam Kees van Baar. Tơdah Kăn teăng mâ Mih a Việt Nam, pôa Marc E. Knapper, pôa Trần Hồng Hà tối, tung pơla hdrối kố nah, tơrŭm cheăng Việt Nam – Mih rế hía rế krá tơniăn ƀă tơdroăng pêi pro châ achê mâu troăng pêi ‘na hbrâ ví kong prâi hơ’lêh, tŏng kum mơngế tro trếo ‘mêi dioxin, pơhlêh xúa on tơhrik tơdâng tơ’mô (JETP)...

Pôa Trần Hồng Hà mơnhên: mâu tơdroăng lâp plâi tơnêi cho xiâm kối tơrŭm cheăng ki kal pơla Việt Nam ƀă Mih; thăm mơnhông tơrŭm cheăng păng ‘nâng, trâu hơngế, djâ ki kơnâ ăm kuăn pơlê péa tơnêi têa; tơdrêng amê kum tơleăng mâu tơdroăng lâp plâi tơnêi.

Tơdah Kăn teăng mâ pôu râng tâng tâng hnoăng kong têa Hà Lan a Việt Nam Kees van Baar, pôa Trần Hồng Hà tối: Tung la ngiâ, péa tơnêi têa kal po rơdâ tíu tơrŭm cheăng, ing mê mơdêk râ, mơjiâng tơdroăng tơrŭm cheăng loi tơngah, châ tơƀrê. Ngế pro xiâm phŏ hnê ngăn tơnêi têa phiu ro mâu khu tơrŭm cheăng, khu tê mơdró Hà Lan veăng tơdroăng mơnúa krâ on tơhrik kơtâu ƀă mâ hâi a kuâ hngêi a mâu hngêi dêi kơ koan tơnêi têa, hngêi trung hriâm, hngêi pơkeăng, tơmeăm tơdjuôm pơlê pơla; veăng tơdroăng tơkêa bro pêi mơnúa a Việt Nam vâ kum pêi kêi đeăng túa pơkâ rah xo khu mơ’no liăn cheăng; troăng hriăn plĕng, hnê xúa kŏng ngê̆; mơnhên ki châ tơƀrê cheăng kâ; rak tơniăn gâk kring, tơniăn tơnêi têa.