Kơxê lơ 29/5, a Tíu pêi cheăng Chin phuh, pôa Trần Hồng Hà, Ngế pro xiâm phŏ hnê ngăn tơnêi têa tơdah pôa Boviengkham Vongdara, Ngế xiâm pơkuâ Kŏng ngê̆ ƀă Tơbleăng tơdroăng nếo ai kong têa Lếo, rơtế khu râ kăn pêi cheăng dế ai roh lăm pôu pêi cheăng a Việt Nam. A roh tơdah, pôa Trần Hồng Hà tối nhên: Ƀă ‘na tơmeăm on tơhrik vêh pro (on tơhrik kơtâu ƀă têa, ƀă khía, kơtâu ƀă hyôh mâ hâi), Lếo kô chiâng môi tung mâu tíu xiâm on tơhrik krúa lĕm, pơhlêh krúa lĕm apoăng dêi kơpong ƀă lâp plâi tơnêi. Kố cho môi tung mâu pơkâ kơlo mơhnhôk mâu khu mơ’no liăn cheăng tung la ngiâ.

Phiu ro mâu tơdroăng môi tuăn cha kĭ pơla Viê̆n Hàn lâm khoa hok ƀă Kŏng ngê̆ Việt Nam ƀă Khu xiâm pơkuâ Kŏng ngê̆ ƀă Tơdroăng nếo ai Lếo, pôa Trần Hồng Hà pói vâ péa pâ thăm tơrŭm cheăng, hnê kŏng ngê̆ vâ péa tơnêi têa rơtế pêi pro pêi cheăng xúa kŏng ngê̆, pơhlêh pêi cheăng krúa lĕm tung pơla rĕng má môi. Tung hnê mơjiâng, mơjiâng mơngế pêi cheăng, Ngế pro xiâm phŏ hnê ngăn tơnêi têa pơkâ thế: Khu xiâm pơkuâ Kŏng ngê̆ ƀă Tơdroăng nếo ai Lếo kal mơnhên tơdroăng kal vâ ki nhên, tơrŭm ƀă Viê̆n Hàn lâm Khoa hok ƀă Kŏng ngê̆ Việt Nam mơjiâng tơdroăng tơkêa bro râ Chin phuh, mơjiâng xiâm kối krá vâ rơtế tơrŭm, rơtế prôk ƀă Việt Nam tung troăng prôk pơhlêh nếo.