Kơxo lơ 24/5, pôa Trần Hồng Hà, Ngế pro xiâm phŏ hnê ngăn Chin phuh hiăng troh veăng hôp ƀă tơpui a Rôh hôp khu râ kăn xiâm Hơ’lêh kơxô̆ Việt Nam – Châu Á 2023.  Ƀă inâi “Tơrŭm Hơ’lêh kơxô̆ vâ mơnhông cheăng kâ kơxô̆”, Rôh hôp ai 4 tơdroăng hôp ‘na inâi: ‘natroăng hơlâ luât tung bro, pơxiâm ƀă tí tăng ‘măn mâu tơdroăng ki kal, tơdroăng ‘măn rak hlá mơ-éa kơxô̆ ƀă rak vế tơniăn tơdroăng kal; tơdjêp, tối tơbleăng mâu tơdroăng ki kal tung mơnhông Chin phuh kơxô̆; khu kăn pơkuâ kơxô̆ ƀă mâu tơdroăng ki rơkê plĕng lâp plâi tơnêi ƀă rôh tơ’lêi hlâu tung hơ’lêh kơxô̆ a Việt Nam ƀă tung kơpong.

Pôa Trần Hồng Hà, Ngế pro xiâm phŏ hnê ngăn tơnêi têa tơpui a Rôh hôp

Tơpui a Rôh hôp, pôa Trần Hồng Hà, Ngế pro xiâm phŏ hnê ngăn tơnêi têa tối nhên, cheăng kâ kơxô̆ cho troăng pơkâ mơnhông tung la ngiâ dêi Việt Nam. Kố cho rôh tơ’lêi hlâu ki kân vâ tơnêi têa pin hơ’lêh nếo, hơ’lêh túa pơkâ mơnhông, tơmiât troh mơnhông mơdêk cheăng kâ rêh ối pơlê pơla rĕng ƀă krá ton.

Ngế pro xiâm phŏ hnê ngăn tơnêi têa tối nhên: Hơ’lêh kơxô̆ kal châ rak tơniăn gâk kring, tơdroăng pơkâ kơmăi kơmok, tơdroăng pơkâ phần mềm, tơniăn ‘măn rak hlá mơ-éa dêi ngế krê, tơniăn hlá mơ-éa dêi tơnêi têa tung khu tơrŭm, kố cho tơdroăng gak kring tơnêi têa.