Kơxê lơ 23/5, pôa Trần Lưu Quang, Ngế pro xiâm phŏ hnê ngăn tơnêi têa hiăng tơdah pôa Thongchanh Manixay, Ngế xiâm pơkuâ kan sát kong têa Lếo dế ai roh lăm pôu pêi cheăng a Việt Nam. A roh tơdah, pôa Trần Lưu Quang rơkâu mâu tơdroăng châ tơƀrê dêi Đảng Nhân yân Kăch măng Lếo ƀă kuăn pơlê mâu Khu xiâm pơkuâ hdroâng mơngế Lếo tung mơnhông mơdêk cheăng kâ – rêh ối pơlê pơla; tối rơdêi, tơrŭm cheăng pơla péa Đảng, péa Tơnêi têa ƀă Kuăn pơlê péa tơnêi têa dế châ tơƀrê lĕm.

Ngế pro xiâm phŏ hnê ngăn tơnêi têa loi tơngah, roh lăm pôu pêi cheăng roh kố dêi Khu râ kăn kô veăng kum trâu hơngế tâ tơrŭm cheăng nhŏng o kân, rŭm môi tuăn ki phá tơ-ê, tơrŭm tâi tâng Việt Nam – Lếo. Ngế pro xiâm phŏ hnê ngăn tơnêi têa pơkâ thế, tung la ngiâ, péa Khu xiâm péa tơnêi têa kal tơrŭm krá tơniăn tâ tung pêi pro mâu tơdroăng môi tuăn tơrŭm cheăng pơla péa kơ koan; thăm pêi pro mâu kơvâ cheăng môi tiah: Hriăn plĕng mơjiâng Luât, pơkuâ Tơnêi têa; tơpui tơno khu râ kăn xiâm pơla péa Khu xiâm, hnê mơjiâng kăn ƀô̆ kŏng chưk; tối ăm dêi pó túa ki rơkê tơtro mơjiâng luât tơdjâk troh khu râ kăn pơkuâ.