Kơxê lơ 20/6, pôa Trần Lưu Quang, Ngế pro xiâm phŏ hnê ngăn tơnêi têa hiăng tơdah Khu kăn Kuô̆k hô̆i châu Âu. Kố cho khu kăn Kuô̆k hô̆i châu Âu má 3 troh pôu Việt Nam sap ing apoăng hơnăm troh nôkố, mơhno tơdroăng ki ngăn nhuô̆m dêi Khu tơrŭm châu Âu ƀă tơdroăng ki thăm mơdêk tơrŭm cheăng ƀă Việt Nam.

A rôh tơdah, Ngế pro xiâm phŏ hnê ngăn tơnêi têa cho pôa Trần Lưu Quang tối rơdêi Việt Nam ngăn nhuô̆m ƀă rơhêng vâ thăm mơdêk tơrŭm cheăng ƀă Khu tơrŭm châu Âu. Ngế pro xiâm phŏ hnê ngăn tơnêi têa rơhêng vâ péa pâ mơdêk tơrŭm tung mâu kơvâ cheăng, malối cho mâu kơvâ cheăng dế hlo tơƀrê tơdjuôm dêi lâp plâi tơnêi ƀă EU ai ivá rơdêi môi tiah mơnhông mơdêk ngiât, mơnhông krá tơniăn, on tơhrik vêh ‘mâi bro, hbrâ ví ƀă tơdroăng ki kong prâi pro hơ’lêh ƀă hên ki ê. Ing mê, veăng kum mơdêk tơrŭm cheăng ƀă tơrŭm tung tâi tâng Việt Nam – EU mơnhông rế hía rế trâu hngế, ai pơxúa.

Ngế pro xiâm phŏ hnê ngăn tơnêi têa pơkâ thế Vi ƀan châu Âu rĕng tah lôi theh trĭng ƀă mâu ká xi xŏng dêi Việt Nam tiô tơdroăng ki mơnhên tối khât ‘na ki mơeăm pêi pro dêi Việt Nam tung tơdroăng ki mơdât tơnăng ká xi xŏng ôh tá tro luât.