Tung hneăng lăm pôu kong têa Lếo ƀă veăng hôp Kân Hô̆i đŏng AIPA - 45, kơxo hâi lơ 18/10, a pơlê kong xiâm Vientiane, pôa Trần Thanh Mẫn Kăn xiâm hnê ngăn Kuô̆k hô̆i hiăng ai rôh tơpui tơno ƀă pôa Thongloun Sisoulith, Kăn xiâm pơkuâ hnê ngăn Đảng Nhân yân Kăch măng Lếo, Kăn xiâm hnê ngăn kong têa Lếo.

Péa ngế kăn tối tơdroăng mơnhông tơniăn lĕm, krá kâk dêi tơdroăng tơrŭm cheăng ki kân, tơrŭm môi tuăn ƀă tơrŭm tung tŭm tơdroăng cheăng pơla Việt Nam - Lếo tung mâu hơnăm hdrối, tung mê, ai hnoăng veăng ‘no ki kal dêi Kuô̆k hô̆i péa tơnêi têa; tối nhên, tung la ngiâ, péa pâ kal pơtối rak ki môi tuăn  tơrŭm krá ƀă dêi rơpó tung tŭm tơdroăng cheăng, loi nhoăm, rơtế mơnhông pêi mâu tơdroăng tơhrâ râ kăn xiâm, tung mê, ai tơdroăng tơhrâ hiăng tơpui rơhéa pơla péa Khu xiâm kal kí tung khế 9/2024 kố nah.

Pơtối mê, mơdêk tơrŭm péa kơ koan mơjiâng luât péa tơnêi têa, tơrŭm krá , gum dêi rơpó tung mâu hneăng hôp Kuô̆k hô̆i ƀă lâp plâi tơnêi môi tiah  IPU, AIPA, APPF; pơtối tơrŭm krá a mâu hneăng hôp tung kơpong ƀă lâp plâi tơnêi.