Pêi cheăng ƀă Vi ƀan Khôi túa lĕm tro ƀă Rêh ối pơlê pơla dêi Kuô̆k hô̆i, pôa Trần Thanh Mẫn, Kăn xiâm hnê ngăn Kuô̆k hô̆i kheăn kơdeăn ‘na tơdroăng mơjiâng luât, tung plâ hneăng cheăng, Vi ƀan hiăng pơkuâ séa ngăn 20 tơdroăng tơkêa bro Luât, 6 tơdroăng tơkêa bro Tơdroăng pơkâ dêi Kuô̆k hô̆i, 1 tơdroăng tơkêa bro Luât pơkâ ƀă 6 mơ-éa chêh hdrối Tơdroăng pơkâ dêi Viƀan pơkuâ Kuô̆k hô̆i.

Tối rơdêi rơtế ƀă mơnhông cheăng kâ, thế tơmâng troh mâu tơdroăng rêh ối pơlê pơla ƀă khôi túa lĕm tro, tiô Kăn xiâm hnê ngăn Kuô̆k hô̆i, kố cho kơvâ ki tơdjâk troh tơdroăng rêh ối hiâm mơno dêi kuăn pơlê. Pơkâ xiâm dêi Đảng pin cho tŏng gum tá tơdroăng rêh ối kế tơmeăm khoăng ƀă tơdroăng rêh ối hiâm mơno ăm kuăn pơlê.

Khôi túa lĕm tro ki xiâm cho vâ rêm ngế kuăn pơlê pơrá rêh ối mo lĕm rơdêi, hâk ro ƀă rơkê tâ. Tiô Kăn xiâm hnê ngăn Kuô̆k hô̆i, kơvâ khôi túa lĕm tro, rêh ối pơlê pơla nôkố dêi tơnêi têa hên kơvâ ki má môi, laga xuân ối ai mâu tơdroăng ki tơ-ê kal athế ai mâu tơdroăng pêi tơdâng tơ’mô. Xua mê, Vi ƀan kal séa ngăn, hriăn plĕng ƀă hbrâ ai mâu tơdroăng pâ thế, pơkâ teăm tơdrêng ƀă Đảng, Tơnêi têa.