Kơxê lơ 1/4, a Hngêi Kuô̆k hô̆i, pôa Trần Thanh Mẫn, Kăn xiâm hnê ngăn Kuô̆k hô̆i hiăng pơkuâ Roh hôp má 56 dêi Vi ƀan pơkuâ Kuô̆k hô̆i. Xông tơpui a roh hôp, Kăn xiâm hnê ngăn Kuô̆k hô̆i tối rơdêi, môi tơdroăng xiâm ki kal cho tơpui hbrâ tơdroăng rah xo mơngế pêi cheăng tơbleăng Kuô̆k hô̆i a Hneăng hôp má môi, Kuô̆k hô̆i hneăng má XVI; pơkâ thế tơdroăng cheăng kố thế châ hbrâ krá tơniăn, inhên, tơniăn troăng, tro tơdroăng pơkâ.

Pôa Trần Thanh Mẫn, Kăn xiâm hnê ngăn Kuô̆k hô̆i tối ăm ‘nâi, Vi ƀan pơkuâ Kuô̆k hô̆i tối ‘na hên tơdroăng xiâm ki kal, tung mê, ai tơdroăng tơkêa bro Luât ‘mâi rơnêu, tơ’nôm mâu troăng dêi Luât Ƀaoh hiêm pơlê pơla. Vi ƀan pơkuâ Kuô̆k hô̆i tơpui roh má mơ’nui ‘na tơdroăng hbrâ Hneăng hôp má môi, Kuô̆k hô̆i hneăng má XVI rơtế mâu tơdroăng tơniăn cheăng dêi Kuô̆k hô̆i tung la ngiâ, ing tơmeăm khoăng troh tơdroăng mơhá liăn ngân tiô troăng hơlâ ki tơdjâk.

Tơdrêng amê, roh hôp kô tơpui tối tơbleăng tơdroăng châ tơƀrê tơdroăng séa ngăn hơnăm 2025, mâu khế apoăng hơnăm 2026 ƀă tối hdrối tơdroăng séa ngăn hơnăm 2027 vâ tơbleăng Kuô̆k hô̆i.