Tung kơthô chêh pơtroh ăm pôa Sekiguchi Masakazu - Kăn xiâm hnê ngăn Kuô̆k hô̆i râ má môi ƀă pôa Nukaga Fukushiro, Kăn xiâm hnê ngăn Kuô̆k hô̆i râ má péa, pôa Trần Thanh Mẫn - Kăn xiâm hnê ngăn Kuô̆k hô̆i hiăng loi khât, ƀă hnoăng cheăng pêi hên tơdroăng ki rơkê ƀă hlối nhoăm dêi tơná, péa kăn hnê ngăn kô pơkuâ Kuô̆k hô̆i râ má môi, Kuô̆k hô̆i râ má péa Nhuk pơtối pêi hên tơdroăng ai pơxúa kân tâ nếo, veăng ‘no hnoăng mơnhông tơƀrê ƀă rế ton rế mơnhông ki rơdêi dêi  Nhuk tung tơdroăng cheăng lâp plâi tơnêi.

Pôa Trần Thanh Mẫn, Kăn xiâm hnê ngăn Kuô̆k hô̆i sôk ro hlo “tơrŭm cheăng  tung tŭm tơdroăng  xua vâ hơniâp lĕm ƀă kro mơdrŏng a châu Á ƀă tung lâp plâi tơnêi’’ pơla Việt Nam ƀă Nhuk dế mơnhông rơdêi tung tâi tâng mâu kơvâ, ƀă tơdroăng loi nhoăm kal kí tơdrêng ƀă tơdroăng hmâ pêi pro ing ton nah, hmâ achê ‘na túa lĕm tro ƀă ki môi tuăn ‘na mâu hdroâng mơngế; tơrŭm cheăng pơla Kuô̆k hô̆i Việt Nam ƀă Kuô̆k hô̆i Nhuk tung mâu hơnăm hdrối kô hía nah ôh tá la lâi pơtê ki mơnhông mơdêk, veăng ‘no hnoăng ki kal ăm tơdroăng mơnhông rơdêi, ki khât tơrrŭm cheăng pơla péa tơnêi têa.