Mâu ngế ki tâ phĭu kheăn kơdeăn tơdroăng pêi pro dêi mâu kăn tơbriât to pro kăn teăng mâ Kuô̆k hô̆i hneăng má XVI, pói tơngah mâu kăn teăng mâ kô khŏm mơ-eăm pêi pro tiô hnoăng pói vâ dêi kuăn pơlê ƀă pêi pro troh tá tui lui mâu tơkêa klêi kơ’nâi châ rah xo.

Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, kăn teăng mâ thế chiu pôu râng tơdroăng ki séa ngăn dêi mơngế ki tâ phĭu ƀă kuăn pơlê ing tơdroăng châ tơƀrê ki khât păng ‘nâng; hnoăng chiâng pêi cheăng dêi Kuô̆k hô̆i pơxiâm ing kuăn pơlê ƀă thế gum kuăn pơlê. Pôa tơkêa tâng châ rah xo kô pêi pro tŭm tơdroăng hiăng pơkâ mơ’no, đi đo tơbleăng, tiâ tối a ngiâ mơngế ki tâ phĭu, pro pơxúa ăm kuăn pơlê cho ahdrối, ngăn tơdroăng ki loi tơngah dêi mơngế ki tâ phĭu cho hnoăng thế mơ-eăm pêi kêi đeăng lĕm tro tâ.