Tung rôh lăm pôu kong têa Italia, hâi lơ 14/4, a pơlê kong xiâm Roma, pôa Trần Thanh Mẫn, Kăn xiâm hnê ngăn Kuô̆k hô̆i ƀă mâu kăn xiâm Việt Nam ai rôh châ tơpui tơno ƀă mâu kăn ƀô̆, mơngế pêi cheăng a tíu pêi cheăng teăng mâ ƀă mơngế Việt Nam a Italia. Kăn xiâm hnê ngăn Kuô̆k hô̆i hiăng tối tơbleăng ăm mơngế Việt Nam a Italia ‘na tơdroăng tung tơnêi têa ƀă mâu tơdroăng hdró pêi pro ki kal mê cho tơkŭm po lêh Hneăng hôp Đảng tung lâp tơnêi têa rôh má 14, hneăng tâ phĭu rah xo kăn Kuô̆k hô̆i hneăng 16 ƀă Hô̆i đong kuăn pơlê rêm râ hneăng 2026 – 2031.

Kăn xiâm hnê ngăn Kuô̆k hô̆i púi vâ, mơngế Việt Nam cho môi khu tơrŭm môi tuăn a Italia, tung mâu hơnăm hdrối hiăng tơrŭm tro, la ngiâ kô ah thế tơrŭm tro tâ nếo, vâ  gum mâu hok tro tơnêi têa pin ki dế hriâm a Italia xo ah hmôi vêh tơnêi têa Việt Nam ai mơngế ki rơkê pêi cheăng. Kăn xiâm hnê ngăn Kuô̆k hô̆i púi vâ mơngế Việt Nam a kong têa Italia rak túa lĕm tro, ton nah dêi hdroâng mơngế,  tơpui rơkong Xuăn a pơlê ki vâi ối, malối  thế râk vế pêi pro luât a tíu ki tơná rêh ối.