Pôa Trần Thanh Mẫn, Kăn xiâm phŏ hnê ngăn Kuô̆k hô̆i hiăng pơtroh rơkong rơkâu ivá, rak tơniăn mo lĕm châ troh Ƀok xối kân Giuse Nguyễn Chí Linh, Ƀok pơkuâ Tô̆ng Yăo phâ̆n Huế ƀă mâu ƀok xối khôp Pâ Xeăng, rơtế ƀă tâi tâng kuăn khôp tung rơnó Pâ Xeăng chu chiâng kuăn mơngế tơniăn mo châ.

Ƀok xối kân Giuse Nguyễn Chí Linh, Ƀok xối pơkuâ Tô̆ng Yăo phâ̆n Huế mơnê tơdroăng tơmâng tŏng kum dêi khu râ kăn pơkuâ Đảng, Tơnêi têa, Măt trâ̆n Tơnêi têa Việt Nam ƀă krê pôa Trần Thanh Mẫn. Tơdroăng ki tơmâng dêi mâu khu râ kăn pơkuâ hiăng pro bâ eăng troh lâp lu, djâ tơdroăng phiu ro ăm kuăn khôp Pâ Xeăng, ing mê, mơjiâng hlê plĕng, rêm ngế kuăn pơlê mơhé tiô khôp ki lâi xuân thế ai hnoăng cheăng, rơtế veăng kum gâk kring pơlê pơla rế hía rế lĕm tro tâ, gâk kring tíu tơná rêh ối.

Rơnó hâi tĭng kân Pâ Xeăng chu chiâng kuăn mơngế ôh tá xê krê to ƀă Tô̆ng Yăo phâ̆n Huế mê cho tâi tâng lâp pơlê pơla, mơhno hiâm mơno rŭm môi tuăn, môi tuăn hên tung tơdroăng khŏm mơ-eăm ƀă pêi pro.