VOV4.Xơ Đăng - Kơxo lơ 11/9, pôa Trần Thanh Mẫn, Kăn cheăng tung Khu xiâm kal kí, Kăn xiâm phŏ hnê mơhno má môi Kuô̆k hô̆i hiăng pơkuâ roh hôp khu râ kăn séa ngăn dêi Kuô̆k hô̆i ‘na pơ’lêh nếo tơdroăng, kơxop mơ-éa hnê hriâm phôh thong. Mâu rơkong tơpui a roh hôp pơkâ thế, thế tơ’nôm troăng kơ-êng rơkong kuăn pơlê vâ môi tiah lâi, vâ ‘nâi, hriăn plĕng, mơnhên rơkong tơpui dêi mâu nôu pâ hok tro ƀă tơdroăng pêi pro mâu Pơkâ dêi Kuô̆k hô̆i ‘na pơ’lêh nếo tơdroăng pêi, kơxop hlá mơ-éa hnê hriâm phôh thong.

Pôa Trần Thanh Mẫn tối nhên, pơkâ ƀă tơdroăng séa mơnhên ngăn cho mơnhên tơdroăng hnê mơhno ƀă pêi pro tơkŭm po pêi pro dêi Chin phuh, mâu Khu xiâm, kơvâ cheăng, Vi ƀan mâu kong pơlê, pơlê kong kơdrâm; mơnhên mâu tơdroăng châ tơƀrê, mâu tơdroăng pá puât, tơvâ tơvân ƀă xiâm kối, pôu râng hnoăng cheăng dêi kơ koan pơkuâ tơnêi têa, mâu khu xiâm, kơvâ cheăng ƀă mâu kong pơlê.

Ing mê, pơkâ mâu troăng pêi, pâ thế kêi đeăng mâu mơ-éa luât ai tơdjâk vâ pơtối po rơdâ pêi pro châ tơƀrê mâu pơkâ dêi Kuô̆k hô̆i ‘na pơ’lêh nếo tơdroăng pêi, kơxop mơ-éa hnê hriâm phôh thong tung hneăng nếo.

A Sa Ly tơplôu ƀă tơbleăng