Klêi kơ’nâi mơgêi Hneăng hôp má Pơtăm, Kuô̆k hô̆i hneăng XV, kơxo lơ 26/6, pôa Trần Thanh Mẫn, Kăn xiâm phŏ hnê ngăn Kuô̆k hô̆i rơtế ƀă khu kăn Kuô̆k hô̆i kong pơlê Hậu Giang hiăng ai rôh trâm mâ kuăn pơlê a pơlê kong kơdrâm Ngã Bảy, kong pơlê Hậu Giang. A rôh trâm mâ kuăn pơlê, kuăn pơlê dêi pơlê kong kơdrâm Ngã Bảy tối phiu ro hlo mâu tơdroăng ki lâp tơnêi têa hiăng rak ƀă pêi klêi tung 6 khế hdrối nah, tơdrêng amê hlối mơnhên tối khât klêi kơ’nâi dêi Hneăng hôp rôh kố ƀă mâu tơdroăng pơkâ ki tơtro.

 Kuăn pơlê dêi pơlê kong kơdrâm Ngã Bảy rơhêng vâ Kuô̆k hô̆i ƀă Chin phuh pơtối tơmâng ngăn pơkâ mâu troăng hơlâ tŏng kum, troăng hơlâ vâ bro tơniăn yă tê mâu pơkeăng xôh kơdê oâ hdrong xúa tung pêi chiâk deăng, bro tơdroăng ki tơniăn ăm tíu tê mâu kế tơmeăm pêi lo ing chiâk deăng, tăng tíu tê rơdâ tâ ăm mâu kế tơmeăm pêi lo ing chiâk deăng, ví tơdroăng ki tơkôm tung mâu kong têa; ai mâu troăng hơlâ tơ’mot mâu ngế pêi cheăng, tăng cheăng pêi ăm sinh viên ki nếo lo ing hngêi trung, ai troăng hơlâ tŏng kum tơ’mot mâu ngế cheăng kơvâ khăm pơlât; séa ngăn mâu tơdroăng pơkâ ôh tá ăm kăn ƀô̆ kong chưk, viên chưk châ xúa tơnêi pêi chiâk deăng ƀă hên ki ê.

Drêng kố, pôa Trần Thanh Mẫn, kăn xiâm phŏ hnê ngăn Kuô̆k hô̆i teăng mâ khu kăn Kuô̆k hô̆i kong pơlê Hậu Giang diâp 20 toăng hngêi tơrŭm ƀă tâi tâng ki kơnâ ai 1 rơtal liăn ăm mâu rơpŏng kơtiê a pơlê kong kơdrâm Ngã Bảy, kong pơlê Hậu Giang.