VOV4.Xơ Đăng - Kơxo lơ (30/9), Khu kăn pơkuâ hnê ngăn Đảng kong pơlê Gia Lai hiăng tơkŭm po hneăng hôp tơbleăng pơkâ rah xo pôa Trương Hải Long - Kăn phŏ hnê ngăn Đảng ủy kong pơlê, Kăn hnê ngăn Vi ƀan kong pơlê Gia Lai pro kăn hnê ngăn Đảng Vi ƀan kong pơlê. A hneăng hôp, khu kăn Đảng ủy kong pơlê Gia Lai tơbleăng pơkâ dêi Vi ƀan pơkuâ cheăng Đảng ủy kong pơlê ‘na tơdroăng rah xo tơ’nôm Kăn hnê ngăn Đảng Vi ƀan kong pơlê hneăng 2021-2026 ƀă pôa Trương Hải Long.

Pôa Hồ Văn Niên, Kăn hnê ngăn Đảng ủy Gia Lai pơcháu pơkâ ƀă ăm reăng rơkâu kơ pôa Trương Hải Long

Tơbleăng xo hnoăng cheăng pêi, pôa Trương Hải Long ăm ‘nâi tơná pôa thế mơ-eăm, khŏm thế mơ-eăm tâi dêi ivá tơná, thế vâ hlối pêi hơnâ khât ƀă tơdroăng cheăng ki châ pơcháu; mơjiâng, rak ngăn tơrŭm dêi rơpó, môi tuăn dêi rơpó tung khu kăn; Rak vế pêi pro tro luât pơkâ tơkŭm môi tuăn tung Đảng, mâu pơkâ pêi cheăng ƀă rơtế Khu kăn Đảng Vi ƀan kong pơlê rŭm môi tuăn, tơkâ luâ tŭm tơdroăng pá, pơloăng mơnúa ƀă đi đo cho hnoăng cheăng pêi kơhnâ khât tung mơnhông mơdêk tơchoâm dêi kong pơlê.

VOV Tây Nguyên/Tơplôu: Gương