VOV4.Xơ Đăng - Tung péa hâi lơ 2 ƀă lơ 3/8, tung roh lăm pôu ƀă pêi cheăng a Hàn Quốc, pôa Võ Văn Thưởng, Kăn pơkuâ hnê mơhno má môi tơdroăng cheăng Đảng ƀă Khu râ kăn xiâm Đảng Kŏng san Việt Nam hiăng ai mâu tơdroăng tơpui tơno, trâm mâ ƀă mâu kăn xiâm dêi Hàn Quốc, tung mê ai roh trâm mâ tơpui tơno ƀă pôa Kim Jin-pyo, Kăn xiâm hnê ngăn Kuô̆k hô̆i kong têa Hàn Quốc, Khu râ kăn pơkuâ dêi Đảng cầm quyền Sức mạnh Quốc dân a Kuô̆k hô̆i, Khu kăn Kuô̆k hô̆i râ má môi nhŏng o Hàn Quốc – Việt Nam, Khu trâm mâ tơpui tơno cheăng kâ – mơhno túa lĕm tro Hàn Quốc – Việt Nam, Khu mâu ngế Hàn Quốc tuăn pâ Việt Nam.

A roh trâm mâ tơpui tơno ƀă pôa Kim Jin-pyo, Kăn xiâm hnê ngăn Kuô̆k hô̆i ƀă mâu kơ koan, khu tơrŭm cheăng dêi Hàn Quốc, pôa Võ Văn Thưởng mơnhên troăng hơlâ thăm tơrŭm cheăng ƀă Hàn Quốc hiăng châ pôa Nguyễn Phú Trọng, Kăn xiâm pơkuâ hnê ngăn Đảng tối a roh tơpui tơno mơ’no tơdrêng tung um tiô troăng hyôh măng ƀă pôa Yoon Seok-yeol, Kăn xiâm pơkuâ kong têa Hàn Quốc; pơkâ thế pôa Kim Jin-pyo môi tuăn tơdroăng péa pâ pơtối thăm tơrŭm kal kí ing tơpui tơno mâu khu râ kăn, thăm tơrŭm cheăng kâ, tê mơdró ƀă mơ’no liăn cheăng.

A Sa Ly tơplôu ƀă tơbleăng