VOV4.Xơ Đăng - Tiô rơkong krếo thế dêi Chin phuh Hàn Quốc, pôa Võ Văn Thưởng, kăn pơkuâ hnê ngăn Đảng hiăng pơkuâ djâ khu kăn xiâm Đảng pin kô lăm pôu păng ‘nâng kong têa Hàn Quốc troh hâi lơ 4/8/2022. Ki xiâm dêi rôh lăm pôu kố cho vâ tơbleăng troăng hơlâ tơpui kâ tơniăn krê, hơniâp lĕm, tơrŭm tơroâ, tơrŭm ƀă mơnhông, hên kơvâ cheăng, hên tơrŭm cheăng tơpui kâ cho pú, cho kong têa tơrŭm cheăng loi tơngah ƀă cho ngế ki tơrŭm cheăng kơhnâ, pôu râng dêi hnoăng tung mâu kong têa tung lâp plâi tơnêi, tung mê ngăn nhuô̆m tơdroăng ki mơdêk ƀă pêi pro trâu hơngế tâ tơrŭm cheăng pơlapéa pâ ƀă kong têa tơrŭm, malối Hàn Quốc cho kong têa tơrŭm cheăng tung la ngiâ ki kal dêi Việt Nam.

Tiô tối hdrối tung rôh lăm pôu kố pôa Võ Văn Thưởng kô troh koh hmât Ngế pro xiâm hnê ngăn kong têa Hàn Quốc, trâm kăn xiâm hnê ngăn Đảng Ivá rơdêi kuăn pơlê, trâm kăn teăng mâ Đảng Dân chủ Rơtế prôk, tơdah kăn xiâm hnê ngăn Khu tơrŭm tơroâ Hàn Quốc – Việt Nam, tơdah kăn xiâm pơkuâ Khu mâu ngế Hàn Quốc ki châ vâi loi tơngah; tơdah Kăn xiâm hnê ngăn Khu mâu ngế Hàn Quốc hâk vâ Việt Nam, lăm pôu kăn teăng mâ Việt Nam a Hàn Quốc.

Katarina Nga tơplôu ƀă tơbleăng