Kơxo hâi lơ 9/6, pôa Võ Văn Thưởng, Kăn xiâm hnê ngăn tơnêi têa pin hiăng tơdah jâ Marinela Petkova, Kăn teăng mâ kong têa Bulgaria troh koh pơ’lâng mơgêi hnoăng cheăng teăng mâ a Việt Nam. Pôa Võ Văn Thưởng hiăng rơkâu kơ Kăn teăng mâ Bulgaria hiăng pêi pro rơkê, klêi đeăng hnoăng cheăng dêi tơná a Việt Nam, ai hên mâu hnoăng cheăng veăng pêi pro tung mơnhông tơrŭm cheăng tiô khôi hmâ ƀă thăm tơrŭm hên tâ nếo mâu tơdroăng cheăng pơla péa pâ tơnêi têa.

Vêh mơnhên, tung mâu hơnăm hdrối mê hía nah, tơrŭm tê mơdró kâ pơla peá pâ châ mơdêk hên ó, maluâ ti mê, Kăn xiâm hnê ngăn tơnêi têa pin tối tiah kố, maluâ hiăng tơtêk la tá hâi teăm tơƀrê khât ƀă tơdroăng ki pói rơhêng vâ dêi péa pâ tơnêi têa, mê kal athế mơdêk hên tâ nếo tơrŭm tê mơdró kâ pơla peá pâ tơnêi têa.

Péa pâ kal athế thâ po Roh hôp má 24 dêi Vi ƀan tơrŭm Chin phuh Việt Nam ƀă Bulgaria ‘na tơrŭm pêi cheăng kâ, tê mơdró ƀă ‘na khoa hok kih thuât tung hơnăm 20223; pâ thế Bulgaria thâ rĕng kĭ tơkêa Tơdroăng mơ’no liăn kum Việt Nam bă châu Âu, pro tơ’lêi hlâu ăm khu mơdró kâ ƀă mâu khu ki mơ’no liăn dêi châu Âu, Bulgaria ƀă Việt Nam veăng pêi pro kơhnâ khât tâ nếo ‘na mơdró kâ pơla péa pâ dêi pó. Péa pâ kal athế pơtối tơrŭm cheăng, tŏng kum dêi pó a mâu roh hôp lâp plâi tơnêi.