Tiô rơkong krếo thế dêi Tíu xiâm Đảng pin, Khu kăn xiâm Đảng Kŏng san Cuba xua Ngế cheăng tung tíu xiâm kal kí, Kăn hnê ngăn Đảng Kŏng san Cuba - pôa Roberto Morales Ojeda pơkuâ djâ lăm pôu Việt Nam ƀă hlối pơkuâ Hôp tơpui tơno rôh má 5 pơla péa Đảng sap hâi lơ 30/4 troh lơ 4/5/2023. Kơxê hâi lơ 3/5, a tíu pêi cheăng dêi kăn xiâm hnê ngăn tơnêi têa pôa Võ Văn Thưởng tơdah tơpui tơno ƀă Khu kăn xiâm Đảng Kŏng san Cuba.

Pôa Võ Văn Thưởng tối phiu ro ‘na mơnhông mơdêk tơniăn lĕm tơrŭm cheăng pơla péa Đảng, péa tơnêi têa tung mâu hơnăm hdrối; tối Việt Nam đi đo tí tăng ngăn vâ ‘nâi ƀă tối mâu tơdroăng xơpá, pơloăng mơnúa xua mơdât ôh tá ăm  tê mơdró ƀă xua tơdjâk kong prâi ôh tá tơniăn, on chếo achê kố; loi khât tiah kố, Đảng, Tơnêi têa ƀă kuăn pơlê Cuba kô pơtối pê klêi  hnoăng cheăng kân kĭn tâ nếo tung kring vé hnoăng pêi tơƀrê dêi kăch măng, mơjiâng chuh ngiah xah hô̆i a chuăn tơniăn ƀă pơtối cho kong têa ki apoăng a châu Mih Latinh.

Kăn xiâm hnê ngăn tơnêi têa pâ thế péa pâ pơtối po rơdâ ƀă mơdêk tơƀrê tơrŭm cheăng pơla péa pâ tung mâu tơdroăng cheăng; tơrŭm krá kâk, veăng kum dêi rơpó tung mâu tơdroăng lâp plâi tơnêi; mơdêk tơrŭm tơtro ƀă tơdroăng ki ai khât, tơmeăm khoăng rơdêi tung tơrŭm cheăng pơla péa Đảng, péa tơnêi têa.

Hdrối mê, tung hâi lơ 3/5, Đảng Kŏng san Việt Nam ƀă Đảng Kŏng san Cuba hiăng rơtế tơkŭm po Hneăng hôp tơpui tơno lĭ luâ̆n roh má V. Hneăng hôp tơpui tơno dó inâi ‘’Mâu tơdroăng lĭ luâ̆n ƀă tơdroăng nôkố ‘na mơjiâng chuh ngiah pơlê pơla a Việt Nam ƀă Cuba’’. Veăng hneăng hôp, tơpui tơno ai mâu khu râ kăn xiâm péa Đảng, khu râ kăn pơkuâ mâu khu cheăng, khu xiâm, kơvâ cheăng, mâu khu hriăn plĕng lĭ luâ̆n khoa hok dêi Việt Nam ƀă Cuba.

Xông tơpui pơxiâm po Hneăng hôp tơpui tơno, pôa Nguyễn Xuân Thắng, Kăn pơkuâ Hok viê̆n Chĭn trĭ Kuô̆k ya Hồ Chí Minh tối rơdêi, tơdroăng hnê tối ăm dêi pó túa ki rơkê tơtro, mâu tơdroăng lĭ luâ̆n ƀă tơdroăng nôkố tung mơjiâng chuh nghiah pơlê pơla a Việt Nam ƀă Cuba cho tơdroăng xiâm tơrŭm cheăng ki kal tâ mê nếo tơrŭm ki má môi lĕm tro pơla péa Đảng ƀă kuăn pơlê péa tơnêi têa.

Tung tơdroăng po hneăng hôp tơpui tơno, mâu kăn ƀă mâu khu pêi cheăng ‘na lĭ luâ̆n, troăng tơmiât dêi péa Đảng hiăng tơbleăng tham luâ̆n ƀă tơpui tơno trâu hơngế ‘na lĭ luâ̆n ƀă tơdroăng nôkố mâu tơdroăng nếo ai nôkố môi tiah: mơjiâng ƀă mơjiâng khu pơkuâ cheăng Đảng a mâu tơdroăng cheăng kâ; mơjiâng ƀă mơjiâng khu kăn ƀô̆, ki má lối cho kăn ƀô̆ pêi cheăng ton xŏn; tơdroăng hnê hriâm kal kí troăng tơmiât tung droh rơtăm; pơkuâ ‘na tơdroăng pơtâng tối, rak tơniăn ‘na gak kring, tơniăn tung troăng măng; mơjiâng tơdroăng cheăng kâ kơchơ mơdró tiô troăng xah hô̆i chuh ngiah dêi Việt Nam ƀă ‘nâi rĕng tơ’nôm tơdroăng cheăng kâ – rêh ối pơlê pơla dêi kong têa Cuba.