Roh lăm pôu pêi cheăng dêi pôa Võ Văn Thưởng kố cho tơdroăng tơpui kâ ƀă kong têa ê râ kăn xiâm kơnâ păng ‘nâng, kal khât, mơnhên tíu cheăng ƀă hnoăng dêi tơnêi têa pin a kơpong ƀă lâp plâi tơnêi. Tơdroăng Kăn xiâm hnê ngăn tơnêi têa veăng leh châ to pro kăn xiâm pơkuâ dêi Pơtáu Charles III mơhno tơdroăng ki nhuô̆m dêi Việt Nam ƀă pơtáu kong têa Ăng-glê ƀă torŭm cheăng ton xŏn Việt Nam – Ăng-glê.

Tiô kăn teăng mâ Việt Nam a kong têa Ăng-glê Nguyễn Hoàng Long, kố cho roh lăm pôu pêi cheăng kong têa Ăng-glê roh má 2 dêi Kăn xiâm hnê ngăn tơnêi têa pin klêi kơ’nâi vâ chê 2 chât hơnăm, tung pơla tơrŭm pơla Việt Nam ƀă Ăng-glê dế mơnhông mơdêk lĕm má môi sap ing hdrối nah troh nôkố.

Ki rơhêng vâ tối, hơnăm 2023, péa tơnêi têa dế rơtế leh tơbâ 50 hơnăm mơjiâng tơrŭm tơpui kâ ƀă hên tơdroăng pêi ki kơnâ, hên tơdroăng ƀă kơdrâm tơdrĕng a hên kơpong a lâp Việt Nam ƀă kong têa Ăng-glê.