Kơxo hâi lơ 16/6, a Ninh Thuận, pôa Võ Văn Thưởng - Kăn xiâm hnê ngăn tơnêi têa pêi cheăng ƀă khu kăn Đảng kong pơlê Ninh Thuận ‘na tơdroăng tơbleăng pêi Pơkâ hneăng hôp má 13 dêi Đảng ƀă Pơkâ hneăng hôp Đảng bộ kong pơlê rôh má 14. Klêi tơmâng mâu tơdroăng veăng tối, mâu tơdroăng tơbleăng a  rôh pêi cheăng, Kăn xiâm hnê ngăn tơnêi têa khĕn kơdeăn kong pơlê hiăng pro klêi 22 to rơchôa têa ki xiâm xúa ôu kâ châ hdoăng 520 rơtuh m3 têa ai têa bê vâ xúa ôu kâ hum roh, tôh báu loăng plâi; chiâng tíu xiâm păn hdrê kơxŏng ki hên má môi dêi lâp tơnêi têa.

Kơxô̆ tơmối troh ôm hyô a kong pơlê rế tâk hên. Kơvâ ‘na mơhno túa lĕm tro- rêh ối pơlê pơla châ tơmâng khât. Mơhno mâu tơdroăng ki pá tung mơnhông mơdêk dêi Ninh Thuận, pôa Võ Văn Thưởng pơkâ thế, Đảng ƀộ, mâu kăn ƀă kuăn pơlê tung kong pơlê  thế pơtối pêi tơdroăng pơkâ hneăng hôp Đảng rêm râ, ƀă  tơdroăng tơmiât pêi rế tơƀrê, hvái ngăn hdrối mâu tơdroăng vâ pêi la ngiâ, pro xiâm ki nếo pêi rơdêi vâ mơnhông cheăng kâ - rêh ối krá tơniăn.

Kăn xiâm hnê ngăn tơnêi têa xuân pâ thế kong pơlê pơtối tơbâ tơdroăng púi vâ mơ-eăm, tơrŭm môi tuăn, mơ-eăm ing ivá  ki rơdêi, tơdroăng pêi pro ton nah, mơhno túa lĕm tro, kuăn mơngế Ninh Thuận; Mơjiâng túa lĕm tro mơdêk tâi tâng dêi kuăn mơngế Ninh Thuận.

Kơmăng hâi lơ 15/6, Kăn xiâm hnê ngăn tơnêi têa hiăng troh veăng leh tơdah Ƀâng chêh inâi ai hnoăng dêi dêi UNESCO mơnhên ƀă tơdroăng pro tơmeăm ƀă tơnêi hneăng dêi mơngế Chăm chêh ‘mot tung inâi tơmeăm khoăng kơnía git kal pơtối rak vế tơdrêng ƀă pơxiâm po mơdĭng Plâi hơmu - drôu Vang Ninh Thuận hơnăm 2023.