Kơxo hâi lơ 11/5, a Hà Nội, pôa Võ Văn Thưởng, Kăn xiâm hnê ngăn tơnêi têa hiăng pêi cheăng ƀă mâu kăn Đảng, Kăn hnê mơhno Tíu xiâm séa ngăn arak luât. Tơbleăng a rôh pêi cheăng, pôa Võ Văn Thưởng, Kăn xiâm hnê ngăn tơnêi têa khĕn kơdeăn mâu tơdroăng pêi pro dêi kơvâ Séa ngăn chiăng pêi châ tơƀrê tung hơnăm hdrối mê hía nah, hlối pâ thế kơvâ cheăng Séa ngăn hdrối rêm tơdroăng cheăng thế tối nhên, hbrâ rơnáu, tơtrŏng, tối tro, xúa luât rak vế pêi pro tro, pơkâ ki pơxúa dêi Tơnêi têa, kuăn pơlê ahdrối, tung hơnăm hdrối, hlối pâ thế kơvâ cheăng Séa ngăn hdrối rêm tơdroăng cheăng.

Tŭm tơdroăng xôi thế châ tơleăng mơnhên teăm tơdrêng, pêi kơtăng, tơleăng tro mơngế, tro tơdroăng xôi, tro luât, ôh tá ăm ai tơdroăng ki tơleăng tơpôu xôi kơ ngế ki ê, chiâng lôi ngế ki xôi khât, tơleăng pơxâu kơtăng ngế ki xiâm  djâ, hlối tối nhên tơdroăng xôi dêi tơrêm ngế, tối tro tơdroăng. Kăn xiâm hnê ngăn tơnêi têa xuân pơkâ thế, ing mâu tơdroăng xôi, tơdroăng pêi pro, kơvâ cheăng thế tí tăng ‘nâi plĕng nhên, tối tro vâ mơhno mâu tíu ki pro ôh tá tro dêi luât, luât pơkâ tŏng kum, luât pơkâ dêi tơnêi têa, teăm tí tăng ‘nâi plĕng ăm Đảng, Tơnêi têa mơjiâng luât pơkâ, pê klêi tơdroăng cheăng hiăng pơkâ tiô luât, pê klêi tro hnoăng cheăng hiăng châ kuăn pơlê pơcháu ‘na séa ngăn hnoăng cheăng xiâm Tơnêi têa tung tơdroăng pêi pro ‘na luât.