Kơxo hâi lơ 23/6, pôa Võ Văn Thưởng, Kăn xiâm hnê ngăn tơnêi têa ƀă kơdrâi pôa pơkuâ leh kân krip tơdah pôa Yoon Suk-Yeol, Kăn xiâm pơkuâ kong têa Hàn Quốc ƀă kơdrâi pôa lăm pôu râ kăn xiâm Tơnêi têa a Việt Nam. Klêi leh tơdah, pôa Võ Văn Thưởng, Kăn xiâm hnê ngăn tơnêi têa ƀă Kăn xiâm pơkuâ kong têa Hàn Quốc tơbleăng inâu mâu kăn xiâm péa tơnêi têa ki veăng leh tơdah.

Pơtối mê, péa ngế kăn xiâm djâ troăng mâu kăn xiâm péa tơnêi têa hôp tơpui tơno. Ngăn nhoăm tơdroăng tơrŭm ƀă Việt Nam, tiô Kăn xiâm pơkuâ kong têa Hàn Quốc lăm pôu Việt Nam drêng kố ai hên mâu râ kăn xiâm, mê cho: Ngế pro xiâm phŏ hnê ngăn tơnêi têa pơkuâ ‘na cheăng kâ hlối cho  pôa Choo Kyung-Ho, Ngế xiâm ngăn ‘na Troăng rơhlâ ƀă ‘na Liăn ngân ƀă mâu Ngế xiâm, mâu kăn pơkuâ mâu khu xiâm, kơvâ cheăng.

Pakĭng mê ối ai lối 200 khu mơdró Hàn Quốc. Kố cho kơxô̆ khu mơdró ki krâm má môi tung mâu rôh lăm pôu kong têa ê achê kố dêi pôa Yoon Suk-Yeol, Kăn xiâm pơkuâ kong têa, ăm hlo ki kal ‘na tơrŭm cheăng kâ, ‘no liăn cheăng mơjiâng tơmeăm khoăng, tê mơdró pơla péa pâ. Tiâ kơ-êng tung rôh lăm pôu Việt Nam pôa Yoon Suk-Yeol, Kăn xiâm pơkuâ kong têa Hàn Quốc púi vâ mơdêk tơrŭm cheăng ƀă Việt Nam tung hên kơvâ cheăng.