Pơxiâm tơdroăng veăng a Leh ki châ pôk dêi Pơtáu kong têa Ănglê Charles III a kong têa Ănglê, kơxê măng lơ 5/5, tiô chôu kong têa kố, pôa Võ Văn Thưởng, Kăn xiâm hnê ngăn tơnêi têa pin hiăng troh pôu kăn ƀô̆, mâu ngế cheăng Kăn teăng mâ ƀă trâm mâ mâu kuăn pơlê Việt Nam a kong têa Ănglê.

Nôkố ai dâng 100 rơpâu ngế kuăn pơlê Việt Nam dế rêh ối, pêi cheăng, hriâm a kong têa Ănglê; ối a lâp lu mâu kơpong, tơnêi dêi Ănglê. Hơnăm 2023, tơbâ 50 hơnăm mơjiâng tơrŭm cheăng tơpui kâ Việt Nam – Ănglê, Kăn teăng mâ ƀă mâu hô̆i, khu dế tơbleăng dêi túa pơkâ, tơdroăng tơbleăng Việt Nam a London ƀă hên pơlê kong kân tung lâp kong têa.

Tối ăm vâi krâ nhŏng o hiâm mơno hơtô lĕm dêi pơlê xiâm, tơnêi têa, pôa Võ Văn Thưởng tối tiah kố, tơdroăng cheăng dêi mâu hô̆i, khu veăng kum kơhnâ khât tung tơdroăng ki mơdêk hnoăng cheăng, tíu cheăng dêi Việt Nam a Ănglê. Pôa Võ Văn Thưởng rơhêng vâ vâi krâ nhŏng o mơngế Việt Nam a Ănglê pêi pro tiô luât ƀă mot tơrŭm cheăng tơniăn lĕm tâ nếo ƀă kong têa dế ối nôkố, pơtối tơkâ luâ mâu tơdroăng xơpá, tơvâ tơvân vâ pêi pro châ tơ’nôm mâu tơdroăng ki ƀlêi chiâng pơtối. Malối, kal rak vế krá rơdêi tơdroăng tơrŭm, tơdjêp pơlê pơla, tơmiât troh pơlê xiâm, rak vế khôi túa lĕm tro hdroâng kuăn ngo.